Read La Bible en Malgache Salamo 25 Bible Online

Salamo 25 - La Bible en Malgache bible

Salamo 25

¹Nataon’i Davida. Aminao, TOMPO ô, no anandratako ny fanahiko.

²Andriamanitro ô, Ianao no itokiako, aoka tsy hitsanga-menatra aho! Aoka tsy hibitahan’ny fahavaloko aho!

³Eny, tsy hisy hitsanga-menatra izay rehetra manantena Anao, fa izay mivadika foana no ho menatra.

⁴Ampahafantaro ny lalanao aho, TOMPO ô, ampianaro ny sitrakao aho.

⁵Tariho amin’ny fahamarinanao aho ka ampianaro, fa Ianao no Andriamanitry ny famonjena ahy; Ianao no andrasako mandritra ny andro.

⁶Tsarovy ny antranao sy ny indrafonao, TOMPO ô, fa efa hatrizay hatrizay ireny.

⁷Aza ny fahotan’ny fahatanorako na ny ratsy nataoko no tsarovanao, fa aoka ho araka ny famindramponao no hahatsiarovanao ahy, noho ny fahasoavanao, TOMPO ô!

⁸Tsara sy mahitsy NY TOMPO, koa izany no anoroany lalana ny mpanota.

⁹Mampandeha ny mpandefitra amin’ny fahamarinana Izy ary mampianatra ny mpandefitra ny lalany.

¹⁰Ny lalan’NY TOMPO rehetra dia famindrampo sy fahamarinana ho an’izay mitandrina ny fanekeny sy ny teny vavolombelony.

¹¹Noho ny anaranao, TOMPO ô dia mamelà ny heloko fa lehibe izany.

¹²Iza no lehilahy matahotra NY TOMPO? Izy no hampianariny izay lalana tokony hofidiny.

¹³Hitoetra amin’ny soa izy ary handova ny tany ny taranany.

¹⁴Ny fisainana miafin’NY TOMPO dia asehony amin’izay matahotra Azy ary ny fanekeny no hampahafantariny azy.

¹⁵Mijery NY TOMPO mandrakariva ny masoko fa Izy no nanafaka ny tongotro tamin’ny fandrika harato.

¹⁶Todiho aho ka amindrao fo fa irery aho ka ory.

¹⁷Mitombo ny fahorian’ny foko; afaho amin’ny fahatereko aho.

¹⁸Jereo ny fahoriako sy ny mavesatra amiko ka mamelà ny fahotako rehetra!

¹⁹Jereo ny fahavaloko fa marobe izy ary loza ny fankahalany ahy.

²⁰Arovy aho mba ho velona ka vonjeo aho! Aoka tsy hitsanga-menatra aho fa mialoka Aminao.

²¹Aoka ny tsy fananan-tsiny sy ny fahitsiana no hiaro ahy fa manantena Anao aho!

²²Andriamanitra ô, afaho amin’ny fahoriany rehetra ny Israely