Read La Bible en Malgache Salamo 31 Bible Online

Salamo 31 - La Bible en Malgache bible

Salamo 31

¹Ho an’ny mpiventy hira. Salamo nataon’i Davida. TOMPO ô! Ianao no ialofako. Aoka tsy hitsanga-menatra akory aho mandrakizay! Afaho amin’ny fahamarinanao aho!

²Atongilano amiko ny sofinao, faingàna hanafaka ahy! Aoka ho vatolampiko fiarovana mafy Ianao mba hamonjena ahy!

³Fa harambatoko sy manda fiarovana ho ahy Ianao ary noho ny anaranao no hitondranao sy hitarihanao ahy.

⁴Hanafaka ahy amin’ny fandrika harato izay nafeniny hamandrihany ahy Ianao, fa Ianao no fiarovana mafy ho ahy.

⁵Eo an-tananao no atolotro ny fanahiko; fa efa nanavotra ahy Ianao, TOMPO ô, Andriamanitry ny fahamarinana!

⁶Halako izay mifikitra amin’ny zava-poana mamitaka, fa izaho dia NY TOMPO no itokiako.

⁷Hifaly sy hiravoravo amin’ny famindramponao aho fa mahita ny fahantrako Ianao ka mahafantatra ny fahorian’ny fanahiko

⁸ary tsy mba nanolotra ahy ho eo an-tanan’ny fahavalo fa efa mampitoetra ny tongotro teo amin’ny malalaka Ianao.

⁹Mamindrà fo amiko, TOMPO ô, fa azom-pahoriana aho; simban’alahelo ny masoko sy ny fanahiko ary ny ao anatiko rehetra.

¹⁰Lanin’alahelo ny aiko sady lanim-pisentoana ny taonako; tsy manan-kery aho noho ny heloko ary efa lany ny taolako.

¹¹Noho ny ataon’ny fahavaloko rehetra dia efa tonga fandatsa aho na dia amin’ny mpiaramonina aza; atahoran’ny olom-pantatro aho ary mandositra ahy izay mahita ahy eny ivelany.

¹²Efa hadino any am-pon’ny olona tahaka ny olona maty aho, tahaka ny vilany fanary.

¹³Fa mandre ny endrikendriky ny maro aho; eny, fampihorohoroana manodidina. Raha miara-mioko hamely ahy izy dia miray tetika hahafaty ny aiko.

¹⁴Nefa matoky Anao aho, TOMPO ô! Hoy aho: Andriamanitro Ianao!

¹⁵Eo an-tananao ny androko; vonjeo aho tsy ho azon’ny tanan’ny fahavaloko sy izay manenjika ahy!

¹⁶Ampamirapirato amin’ny mpanomponao ny tavanao; vonjeo amin’ny famindramponao aho!

¹⁷Aoka tsy hitsanga-menatra aho, TOMPO ô, satria miantso Anao! Fa aoka kosa ho menatra ny ratsy fanahy ka hangina any amin’ny fitoeran’ny maty*.

¹⁸Aoka hangina ny molotra mandainga izay miteny sahisahy manohitra ny marina amin’ny avonavona sy ny fanamavoana!

¹⁹Akory re ny haben’ny hatsaranao izay voarakitrao ho an’ny matahotra Anao, dia izay nataonao teo anatrehan’ny zanak’olombelona, no ho an’izay mialoka Aminao!

²⁰Hanafina azy ao amin’ny fierena eo anatrehanao Ianao mba tsy ho tratry ny teti-dratsy ataon’ny olona izy; hampiery azy ao amin’ny tranonao Ianao mba tsy ho azon’ny lela miampanga izy.

²¹Isaorana anie NY TOMPO! Fa nataony mahagaga ny famindrampony tamiko tao an-tanàna mimanda.

²²Fa hoy aho tamin’ny fahatairako: Voafongotra tsy ho eo imasonao aho! Kanjo nihaino ny feon’ny fifonako ihany Ianao raha nitaraina Taminao aho.

²³Tiava NY TOMPO, ry olony masina rehetra! Miaro ny marina NY TOMPO fa mamaly mafy ny mpiavonavona kosa Izy.

²⁴Mahereza, ary aoka hatanjaka ny fonareo, dia ianareo rehetra izay miandry NY TOMPO.