Read La Bible en Malgache Salamo 32 Bible Online

Salamo 32 - La Bible en Malgache bible

Salamo 32

¹Nataon’i Davida. Tononkalo. Sambatra ny olona izay voavela ny helony ary voasarona ny fahotany!

²Sambatra ny olona izay tsy isain’NY TOMPO heloka ary tsy misy fitaka ny fanahiny!

³Raha nangina aho dia nihalany ny taolako rehetra noho ny fitarainako mandritra ny andro,

⁴fa navesatra tamiko andro aman’alina ny tananao; niova ny fahatanjahako, toy ny azon’ny fahamainana amin’ny lohataona. Fiatoana

⁵Ny fahotako dia nambarako Taminao ary ny heloko tsy mba nafeniko; hoy aho: Hiaiky ny fahadisoako amin’NY TOMPO aho; ary Ianao dia namela ny heloko, ny fahotako. Fiatoana

⁶Izany no aoka hivavahan’ny matahotra an’Andriamanitra rehetra Aminao amin’izay fotoana hahitana Anao! Eny tokoa, na dia tondraka aza ny ranobe dia tsy hahatratra azy izany.

⁷Ianao no fiereko, miaro ahy tsy ho azon’ny fahoriana Ianao; fihobiam-pamonjena no ahodidinao ahy. Fiatoana

⁸Hanome saina anao sy hampianatra anao izay lalana tokony halehanao Aho; hanolo-tsaina anao Aho ary hitsinjo anao ny masoko.

⁹Aza manahaka ny soavaly na ny ampondra tsy manan-tsaina; vy sy lamboridy no haingo hihazonana azy fa tsy mety manakaiky anao izy.

¹⁰Be ny fanaintainan’ny ratsy fanahy, fa izay matoky NY TOMPO kosa dia hodidinin’ny famindrampo.

¹¹Mifalia amin’NY TOMPO ary miravoravoa ianareo olona marina! Mihobia, ianareo mahitsy fo rehetra.