Read La Bible en Malgache Salamo 33 Bible Online

Salamo 33 - La Bible en Malgache bible

Salamo 33

¹Mihobia ho an’NY TOMPO ianareo, ry olona marina! Fa mendrika hataon’ny olo-mahitsy ny fiderana.

²Miderà NY TOMPO amin’ny lokanga; mankalazà Azy amin’ny valiha tory folo.

³Mihirà hira vaovao ho Azy! Mitendre tsara amin’ny feo mihoby.

⁴Fa mahitsy ny tenin’NY TOMPO ary mahatoky avokoa ny asany rehetra.

⁵Tia fahamarinana sy rariny Izy; henika ny famindrampon’NY TOMPO ny tany.

⁶Tamin’ny tenin’NY TOMPO no nanaovana ny lanitra ary ny fofonain’ny vavany no nanaovana izay rehetra ao aminy.

⁷Mampiavosa ny rano ao an-dranomasina ho toy ny antontan-javatra iray Izy; mitahiry ny rano lalina ho ao amin’ny trano fitahirizana Izy.

⁸Aoka hatahotra NY TOMPO ny tany rehetra! Aoka hangovitra eo anatrehany ny mponina rehetra amin’izao tontolo izao!

⁹Fa Izy no niteny dia ary izany; Izy no nandidy dia nitoetra mafy izany.

¹⁰Mahafoana ny fikasan’ny firenen-tsamihafa NY TOMPO; mahatsinontsinona ny hevitry ny olona Izy.

¹¹Maharitra mandrakizay ny fikasan’NY TOMPO ary mahatratra ny taranaka fara aman-dimby ny hevitry ny fony.

¹²Sambatra ny firenena izay manana NY TOMPO ho Andriamaniny, dia ny olona nofidiny ho lovany!

¹³Avy eny an-danitra no itsinjovan’NY TOMPO; mijery ny zanak’olombelona rehetra Izy;

¹⁴avy eo amin’ny fonenany no ijereny ny mponina rehetra ambonin’ny tany,

¹⁵dia Izy izay namolavola ny fon’izy rehetra sy mamantatra ny asany rehetra.

¹⁶Tsy misy mpanjaka voavonjin’ny hamaroan’ny miaramilany; ny olo-mahery dia tsy voavonjin’ny haben’ny heriny.

¹⁷Ny soavaly dia tsy azo itokiana ho famonjena ary tsy mahavonjy ny haben’ny tanjany.

¹⁸Indro, mitsinjo izay matahotra Azy ny mason’NY TOMPO, dia izay manantena ny famindrampony,

¹⁹mba hanafaka azy amin’ny fahafatesana sy hamelona azy raha misy mosary.

²⁰Miandry NY TOMPO ny fanahintsika; famonjena antsika sy ampingantsika Izy;

²¹fa Izy no ifalian’ny fontsika satria ny anarany masina no itokiantsika.

²²TOMPO ô, aoka ny famindramponao hitoetra aminay araka ny iandrasanay Anao!