Read La Bible en Malgache Salamo 34 Bible Online

Salamo 34 - La Bible en Malgache bible

Salamo 34

¹Salamo nataon’i Davida tamin’izy nody adala teo anatrehan’i Abimeleka ka naha voaroaka azy teo sy nahatonga azy nandeha. Hisaotra NY TOMPO lalandava aho; ho eo am-bavako mandrakariva ny fiderana Azy.

²NY TOMPO no reharehan’ny fanahiko; hahare izany ny mpandefitra ka ho faly.

³Miaraha mankalaza NY TOMPO amiko ary aoka hiara-manandratra ny anarany isika.

⁴Nitady NY TOMPO aho dia namaly ahy Izy ka nanafaka ahy tamin’ny tahotro rehetra.

⁵Izay mijery Azy dia miramirana sady tsy mangaihay ny tavany.

⁶Ity olona ory ity no niantso dia nihaino NY TOMPO ka namonjy azy tamin’ny fahoriany rehetra.

⁷Ny Anjelin’NY TOMPO* dia mitoby manodidina izay matahotra Azy ka manafaka azy.

⁸Andramo ka zahao fa tsara NY TOMPO! Sambatra izay olona mialoka Aminy!

⁹Matahora NY TOMPO, ianareo olony masina! Fa tsy misy zava-maha ory izay matahotra Azy.

¹⁰Na dia ny liona tanora aza rehefa tsy ampy hanina dia noana; fa izay mitady NY TOMPO kosa dia tsy ho orin-java-tsoa akory.

¹¹Avia, anaka, mihainoa ahy! Ny fahatahorana NY TOMPO no hampianariko anareo.

¹²Na iza na iza ianao no maniry fiainana ka tia andro maro hahitana ny soa

¹³dia arovy amin’ny ratsy ny lelanao ary aoka ny molotrao tsy hiteny fitaka.

¹⁴Halaviro ny ratsy ka manaova soa; mitadiava fihavanana ka araho izany.

¹⁵Ny mason’NY TOMPO dia mitsinjo ny marina ary ny sofiny dia mihaino ny fitarainany.

¹⁶Ny tavan’NY TOMPO dia tezitra amin’ny mpanao ratsy mba hofongorany tsy ho eo amin’ny tany ny fahatsiarovana azy.

¹⁷Mitaraina ny marina ary mihaino azy NY TOMPO ka manafaka azy amin’ny fahoriany rehetra;

¹⁸akaiky an’izay manana fo mangorakoraka NY TOMPO ary mamonjy izay torotoro fanahy.

¹⁹Maro ny fahorian’ny marina, nefa NY TOMPO manafaka azy amin’izany rehetra izany.

²⁰Miaro ny taolany rehetra Izy; tsy hisy ho tapaka ireny na dia iray akory aza.

²¹Hahafaty ny ratsy fanahy ny fahoriana ary hohelohina izay mankahala ny olona marina.

²²Fa manavotra ny fanahin’ny mpanompony NY TOMPO ka tsy mba hisy hohelohina izay rehetra mialoka Aminy.