Read La Bible en Malgache Salamo 36 Bible Online

Salamo 36 - La Bible en Malgache bible

Salamo 36

¹Ho an’ny mpiventy hira. Nataon’i Davida, mpanompon’NY TOMPO. Misy fitenin’ny ratsy fanahy tonga ato an-tsaiko; araka ny heviny dia tsy misy tokony hatahorana an’Andriamanitra.

²Fa miarahaba tena kosa izy ka tsy mahafantatra ny helony sady tsy mankahala izany.

³Ny tenin’ny vavany dia faharatsiam-panahy sy fitaka; tsy ao an-tsainy intsony ny hanao ny tsara.

⁴Asa ratsy no saintsaininy eo am-pandrianany; mitsangana eo amin’ny lalana tsy mety izy; tsy mba laviny akory ny ratsy.

⁵TOMPO ô, mipaka amin’ny lanitra ny famindramponao, miantefa amin’ny rahona ny fahamarinanao.

⁶Ny fahamarinanao dia tahaka ny tendrombohitra avo dia avo, ny fitsaranao dia toy ny lalina lehibe*. Ny olona sy ny biby dia samy vonjenao, TOMPO ô!

⁷Endre ny hatsaran’ny famindramponao, Andriamanitra ô! Mialoka eo ambany elatrao ny zanak’olombelona.

⁸Voky ny matavy ao amin’ny tranonao izy; ny zava-tsoanao mikoriana no ampisotroinao azy.

⁹Fa ao Aminao no misy loharanon’aina; ny fahazavanao no hahitanay fahazavana.

¹⁰Ampahareto amin’izay mahalala Anao ny famindramponao ary amin’ny mahitsy fo ny fahamarinanao.

¹¹Aoka tsy hanitsaka ahy ny tongotry ny mpiavonavona, na hampandositra ahy ny tanan’ny ratsy fanahy.

¹²Amin’izany no mahalavo ny mpanao ratsy; mianjera izy ka tsy tafarina.