Read La Bible en Malgache Salamo 37 Bible Online

Salamo 37 - La Bible en Malgache bible

Salamo 37

¹Nataon’i Davida. Aoka tsy hirehitra noho ny amin’ny mpanao ratsy ny fahatezeranao ary aza mialona ny mpanao heloka,

²fa maina vetivety tahaka ny ahitra izy ka halazo tahaka ny ahi-maitso.

³Matokia NY TOMPO ianao ka manaova soa, dia honina amin’ny tany ianao ka ho faly amin’ny fahamarinana.

⁴Aoka NY TOMPO no iravoravoanao, dia homeny anao izay irin’ny fonao.

⁵Ankino amin’NY TOMPO ny lalanao ary matokia Azy fa Izy no hanatanteraka.

⁶Hampiseho ny fahamarinanao tahaka ny mazava Izy ary ny rariny ho anao tahaka ny mitataovovonana.

⁷Miandrasa NY TOMPO amim-pahanginana ianao ka manantenà Azy; aza tezitra amin’izay ambinina amin’ny lalany, dia amin’izay olona manao sain-dratsy.

⁸Mitsahara amin’ny fahatezerana ary mahafoiza ny fahavinirana; aoka tsy ho tezitra ianao fa ratsy no hiafaran’izany.

⁹Fa hofongorana ny mpanao ratsy ary izay manantena NY TOMPO no handova ny tany.

¹⁰Rehefa afaka kelikely dia tsy hisy ratsy fanahy intsony! Handinika ny fonenany ianao fa tsy ho ao intsony izy!

¹¹Ny mpandefitra kosa no handova ny tany ka hiravoravo amin’ny haben’ny fiadanana.

¹²Manao hevi-dratsy hamelezany ny marina ny ratsy fanahy ka mihidy vazana aminy.

¹³Mihomehy azy ny Tompo satria hitany fa ho tonga ny androny.

¹⁴Nanatsoaka ny sabany ny ratsy fanahy ka nanenjana ny tsipìkany mba hampikarapoka ny ory sy ny mahantra ary hamono ny mahitsy lalana.

¹⁵Hitsatoka amin’ny fony ihany ny sabany ary ho tapatapaka ny tsipìkany.

¹⁶Tsara lavitra ny kely ananan’ny olona marina iray noho ny be ananan’ny ratsy fanahy maro;

¹⁷ho tapatapaka ny sandrin’ny ratsy fanahy, fa NY TOMPO manohana ny marina.

¹⁸Fantatry NY TOMPO ny andron’ny olo-mahitsy ary ho mandrakizay ny lovany.

¹⁹Tsy mba hitsanga-menatra ireny amin’ny andro fahoriana ary amin’ny taona misy mosary dia ho voky izy.

²⁰Fa ho ringana ny ratsy fanahy ary ho tahaka ny voninahitry ny saha ny fahavalon’NY TOMPO; ho levona izy; eny, ho levon-ko setroka izy.

²¹Mitrosa ny ratsy fanahy nefa tsy manonitra, fa mamindra fo kosa ny marina ka manome.

²²Fa izay tahiny no handova ny tany ary izay ozoniny kosa no hofongorana.

²³Avy amin’NY TOMPO no mahalavorary ny dian’ny olona ka Izy no mankasitraka ny lalany;

²⁴na dia lavo aza izy, tsy dia mikarapoka satria NY TOMPO no mitantana azy.

²⁵Efa mba tanora ihany aho ary efa antitra ankehitriny, fa tsy mbola hitako izay marina nafoy, na ny zanany mangataka hanina.

²⁶Miantra mandrakariva ireny ka mampisambotra ary hotahina ny taranany.

²⁷Halaviro ny ratsy ka manaova soa, dia honina mandrakizay ianao.

²⁸Fa NY TOMPO tia rariny sady tsy hahafoy ny olony masina. Harovana mandrakizay ireo; fa ny taranaky ny ratsy fanahy kosa dia hofongorana.

²⁹Ny marina dia handova ny tany ka honina eo aminy mandrakizay.

³⁰Miresaka fahendrena ny vavan’ny marina ary manambara ny rariny ny lelany.

³¹Ny lalànan’Andriamaniny no ao am-pony; tsy mba ho solafaka ny diany.

³²Ny ratsy fanahy dia mitsikilo ny marina ka mitady ny hahafaty azy;

³³NY TOMPO anefa tsy hahafoy azy eo an-tanany na hamela azy ho voaheloka raha tsaraina.

³⁴Miandrasa NY TOMPO ka tandremo ny lalany dia hanandratra anao handova ny tany Izy; ho faly ianao hahita ny hamongorana ny ratsy fanahy.

³⁵Efa hitako ny ratsy fanahy fa loza loatra izy; nisandrahaka tahaka ny hazo maitso naniry ho azy.

³⁶Kanjo nandalo izy ka indro, tsy teo intsony. Nitady azy aho nefa tsy hita izy.

³⁷Diniho ny tsy misy tsiny ka jereo ny mahitsy; manana ny ho aviny ny olona tia fihavanana.

³⁸Fa ny mpanota kosa dia hiara-haringana; ho fongotra ny hoavin’ny ratsy fanahy.

³⁹Ny famonjena ny marina dia avy amin’NY TOMPO; fiarovana mafy ho azy Izy amin’ny andro fahoriana.

⁴⁰Ary NY TOMPO mamonjy azy sy manafaka azy; eny, manafaka azy amin’ny ratsy fanahy Izy ka mamonjy azy, satria mialoka Aminy ireo.