Read La Bible en Malgache Salamo 38 Bible Online

Salamo 38 - La Bible en Malgache bible

Salamo 38

¹Salamo nataon’i Davida. Ho fampahatsiarovana. TOMPO ô, aza ny fahatezeranao no ananaranao ahy ary aza ny fahaviniranao no amaizanao ahy!

²Fa mitsatoka amiko ny zana-tsipìkanao ary manindry ahy mafy ny tananao.

³Tsy misy fahasalamana ao amin’ny nofoko noho ny fahatezeranao; tsy misy fiadanana ao amin’ny taolako noho ny fahotako.

⁴Fa mihoatra ny lohako ny heloko; tahaka ny entana mavesatra izany ka tsy zakako.

⁵Maimbo sady mihalalina ny feriko noho ny hadalako.

⁶Mitanondrika sy mijoretra izay tsy izy aho ary toy ny misaona mandrakariva.

⁷Mamaivay avokoa ny voako ka tsy misy izay salama ao amin’ny nofoko.

⁸Marikoditra aho sady torovana indrindra, midradradradra aho sady mitoloko ny foko.

⁹Tompo ô, eo anatrehanao ny faniriako rehetra; tsy mba miafina Aminao ny fisentoako.

¹⁰Miemponempona ny foko, nandao ahy ny heriko; tsy ato amiko intsony na ny fahiratan’ny masoko aza.

¹¹Manalavitra ny aretiko ny namako sy ny sakaizako ary mijanona eny lavitra eny ny havako.

¹²Manao vela-pandrika ireo izay mitady ny aiko ary miteny fampihorohoroana ireo izay mitady hanimba ahy sady miteny fitaka mandrakariva.

¹³Fa izaho dia tahaka ny marenina ka tsy mandre ary tahaka ny moana ka tsy mahaloa-bava;

¹⁴eny, tahaka ny olona tsy mandre sady tsy misy teny havaly eo am-bavany.

¹⁵Fa Ianao no antenaiko, TOMPO ô; Ianao no hamaly, ry Tompo Andriamanitro ô.

¹⁶Fa hoy aho: Sao dia hifalian’izy ireo anie aho; raha mibolasitra ny tongotro dia hirehareha amiko izy!

¹⁷Fa efa ho lavo aho ary ny fanaintainako dia tsaroako mandrakariva.

¹⁸Fa ibabohako ny heloko; matahotra aho noho ny fahotako.

¹⁹Fa velona ihany ny fahavaloko sady mahery, maro no mankahala ahy tsy amin’antony;

²⁰mamaly ratsy ny soa izy ireo ka mandrafy ahy ho valin’ny fikatsahako ny tsara.

²¹Aza mahafoy ahy, RY TOMPO ô! Ry Andriamanitro ô, aza manalavitra ahy!

²²Faingàna hamonjy ahy, ry Tompo, Mpamonjy ahy, ô!