Read La Bible en Malgache Salamo 42 Bible Online

Salamo 42 - La Bible en Malgache bible

Salamo 42

¹Ho an’ny mpiventy hira. Maskila. Nataon’ny Koraìta. Tahaka ny diera main’ny hetaheta maniry ny rano an’ony no anirian’ny fanahiko Anao, Andriamanitra ô!

²Mangetaheta an’Andriamanitra ny fanahiko, dia Andriamanitra velona; rahoviana no ho tonga aho ka hiseho eo anatrehan’Andriamanitra?

³Ny ranomasoko no sakafoko andro aman’alina, amin’ny filazana amiko mandrakariva hoe: Aiza izay Andriamanitrao?

⁴Izao zavatra izao anefa no hotsarovako rehefa mamboraka ny fanahiko ato anatiko aho, dia ny nandrosoako niaraka tamin’ny olona maro sy ny nitarihako azy ho any amin’ny tranon’Andriamanitra, tamin’ny feo mihoby sy midera, dia olona maro izay nitandrina ny andro firavoravoana.

⁵Nahoana ianao ry fanahiko no mitanondrika ka mitoloko ato anatiko? Manantenà an’Andriamanitra ianao! Fa mbola hidera Azy ihany aho noho ny famonjen’ny tavany.

⁶Andriamanitro ô, mitanondrika ato anatiko ny fanahiko. Izany no ahatsiarovako Anao atỳ amin’ny tanin’i Jordana sy ireo Hermona ary ny tendrombohitra Mizara.

⁷Ny lalina dia miantso ny lalina noho ny firohondrohon’ny rian-dranonao; nanafotra ahy ny onjanao rehetra sy ny alondranonao.

⁸Handidy ny famindrampony NY TOMPO nony andro ary hihira ho Azy aho rehefa alina. Vavaka amin’Andriamanitra izay mamelona ahy izany.

⁹Hoy aho amin’Andriamanitra Vatolampiko: Nahoana no nanadino ahy Ianao? Nahoana no mandeha mijoretra aho noho ny fampahorian’ny fahavaloko?

¹⁰Toy ny zavatra mahatorotoro ny taolako no fandatsan’ny fahavaloko ahy amin’ny ilazany amiko isanandro hoe: Aiza izay Andriamanitrao?

¹¹Nahoana no mitanondrika ianao, ry fanahiko? Nahoana no mitoloko ato anatiko ianao? Manantenà an’Andriamanitra! Fa mbola hidera Azy ihany aho; Izy no famonjena ahy sady Andriamanitro.