Read La Bible en Malgache Salamo 44 Bible Online

Salamo 44 - La Bible en Malgache bible

Salamo 44

¹Ho an’ny mpiventy hira. Nataon’ny Koraìta. Maskila. Ny sofinay no nandrenesanay, Andriamanitra ô, ny razanay no nitantara taminay ny asa nataonao tamin’ny androny, tamin’ny andro fahiny.

²Ny tananao no nandroahanao ny firenen-tsamihafa fa ny razanay kosa dia nampitoerinao; efa nampahorinao ny firenena maro fa izy kosa dia nataonao mahafeno ny tany.

³Fa tsy ny sabany no nahazoany ny tany ary tsy ny sandriny no namonjy azy fa ny tananao ankavanana sy ny sandrinao ary ny fahazavan’ny tavanao satria sitrakao izy.

⁴Ianao dia Ianao no Mpanjakako, Andriamanitra ô; Didio ny famonjena ho an’i Jakoba!

⁵Ianao no anosehanay ny fahavalonay; ny anaranao no anitsakitsahanay izay mitsangana hamely anay.

⁶Fa tsy ny tsipìkako no itokiako ary ny sabatro dia tsy hahavonjy ahy;

⁷fa Ianao no namonjy anay tamin’ny fahavalonay ary izay nankahala anay dia nataonao menatra.

⁸Andriamanitra no ankalazainay mandrakariva ary ny anaranao no hoderainay mandrakizay. Fiatoana

⁹Kanefa nanary anay Ianao ka nampitondra henatra anay, ary tsy mivoaka miaraka amin’ny antokon’ny miaramilanay intsony Ianao.

¹⁰Ataonao mihemotra manoloana ny fahavalonay izahay, koa ny mankahala anay dia manaram-po mamabo.

¹¹Atolotrao tahaka ny ondry hohanina izahay ary aelinao any amin’ny firenen-tsamihafa.

¹²Mivarotra ny vahoakanao tsy amim-bola tsy amin-karena Ianao ka tsy mahazo tombony amin’ny vidiny akory.

¹³Ataonao fandatsan’ny mpiaramonina aminay izahay, dia fanakora sy faneson’izay manodidina anay.

¹⁴Ataonao ho oha-pitenenan’ny firenen-tsamihafa izahay, fihifikifihan-doha amin’ny olona maro.

¹⁵Tsaroako mandrakariva ny fahafaham-barakako ary manafotra ahy ny henatro

¹⁶noho ny feon’ny mpanaratsy sy ny mpanamavo, noho ny fahavalo sy ny mpamaly ratsy.

¹⁷Izany rehetra izany no manjo anay, nefa tsy manadino Anao izahay sady tsy mivadika amin’ny fanekenao;

¹⁸tsy mihemotra ny fonay ary tsy miala amin’ny lalanao ny dianay,

¹⁹nefa Ianao dia nanorotoro anay teo amin’ny fitoeran’ny amboadia, sady nanarona anay tamin’ny aloky ny fahafatesana.

²⁰Raha toa ka nanadino ny anaran’Andriamanitray izahay, na nanandra-tanana tamin’ny andriamanitra hafa,

²¹moa tsy ho nahita izany va Andriamanitra satria Izy mahalala ny miafina ao am-po?

²²Fa noho ny Aminao no amonoana anay isanandro, toy ny ondry hovonoina no fijery anay.

²³Mifohaza Tompo ô! Nahoana Ianao no matory? Miarena! Aza manary anay mandrakizay!

²⁴Nahoana no manafina ny tavanao Ianao ka manadino ny fahantranay sy ny fahorianay?

²⁵Fa mihohoka amin’ny vovoka izahay, miraikitra amin’ny tany ny kibonay.

²⁶Mitsangàna hamonjy anay! Avoty izahay araka ny famindramponao.