Read La Bible en Malgache Salamo 45 Bible Online

Salamo 45 - La Bible en Malgache bible

Salamo 45

¹Ho an’ny mpiventy hira. Al-shoshanim. Nataon’ny Koraìta. Maskila. Tononkiram-pitiavana. Mampiboiboika teny tsara ny foko. Hoy aho hoe: Ho an’ny mpanjaka ny asako! Aoka ny lelako ho toy ny fanoratan’ny haingam-panoratra!

²Tsara tarehy noho ny zanak’olombelona rehetra ianao; fahasoavana no naidina tamin’ny molotrao; izany no nitahian’Andriamanitra anao mandrakizay.

³Fehezo eo amin’ny andilanao ny sabatrao, ry ilay mahery, dia ny fiandriananao sy ny voninahitrao;

⁴eny, amin’ny voninahitra no hitaingenanao soavaly mba handrosoanao amin-kery, ho fiarovana ny marina sy ny fahalemem-panahy ary ny rariny sy hitsiny! Aoka hanoro anao hanao asa mahatahotra ny tananao ankavanana.

⁵Voaranitra ny zana-tsipìkanao, firenena maro no ho ringana ka hohitsakitsahinao; hitsatoka ao am-pon’ny fahavalon’ny mpanjaka izany.

⁶Andriamanitra ô, mandrakizay doria ny sezafiandriananao; tehim-pahamarinana ny tehim-panjakanao.

⁷Tianao ny fahamarinana fa halanao ny heloka. Noho izany no nanosoran’Andriamanitra anao, fa tsy ny namanao, diloilo fifaliana.

⁸Manitra miora sy hazomanitra ary kasia ny fitafianao rehetra, zavamaneno tendrena avy ao amin’ny lapa ivoara no mampifaly anao.

⁹Zanakavavin’ny mpanjaka no isan’ny malalanao; eo ankavananao no itoeran’ny vadin’ny mpanjaka; miravaka volamena avy any Ofira izy.

¹⁰Henoy, Razazavavy, jereo ka atongilano ny sofinao; hadinoy ny firenenao sy ny tranon’ny rainao.

¹¹Irin’ny mpanjaka ny hatsaran-tarehinao satria izy no tomponao, koa miankohofa eo anatrehany.

¹²Hitondra fanomezana ho anao, ry zanakavavin’i Tiro, ny mpanankarena amin’ny vahoaka dia te hila sitraka aminao.

¹³Be voninahitra ny zanakavavin’ny mpanjaka ao an-dapa; tenona misy volamena no fitafiany.

¹⁴Mitafy lamba misoratsoratra izy raha entina ho ao amin’ny mpanjaka. Ny zazavavy sakaizany izay manaraka azy dia entina ao aminao.

¹⁵Entina amin’ny fifaliana sy ny firavoravoana ireny; hiditra ao an-dapan’ny mpanjaka izy.

¹⁶Handimby ny anaran-drainao ny zanakao lahy, hotendrenao ho mpanapaka any amin’ny tany rehetra izy.

¹⁷Hampahatsiaro ny anaranao hatramin’ny taranaka fara aman-dimby aho. Izany rehetra izany no hideran’ny firenena anao mandrakizay doria.