Read La Bible en Malgache Salamo 46 Bible Online

Salamo 46 - La Bible en Malgache bible

Salamo 46

¹Ho an’ny mpiventy hira. Nataon’ny Koraìta. Al-alamot. Tononkira. Andriamanitra no fialofana sy hery ho antsika; Mpamonjy mora azo indrindra amin’ny fahoriana Izy.

²Koa izany no tsy atahorantsika na dia mihovotrovotra aza ny tany, na dia mifindra ho ao anatin’ny ranomasina aza ny tendrombohitra,

³na mirohondrohona sy misamboaravoara aza ny onjany ka mihorohoro ny tendrombohitra noho ny fisafoakany. Fiatoana

⁴Misy ony iray, koa ny sampany dia mampifaly ny tanànan’Andriamanitra, fonena-masin’ny Avo Indrindra;

⁵Andriamanitra no eo afovoany ka tsy mba hihetsika akory izy; Andriamanitra no hamonjy azy rehefa madiva ho maraina ny andro.

⁶Mitabataba ny firenen-tsamihafa, mikorontana ny fanjakana maro; mamoaka ny feony Izy ka niempo ny tany.

⁷Andriamanitra, Tompon’izao rehetra izao, no momba antsika, Andriamanitr’i Jakoba no fiarovana avo ho antsika. Fiatoana

⁸Avia, jereo ny asan’NY TOMPO, fa mahatonga faharavana etỳ ambonin’ny tany Izy.

⁹Mampitsahatra ady hatrany amin’ny faran’ny tany Izy, mamotipotika ny tsipìka sy manapaka ny lefona Izy ary mandoro ny sarety amin’ny afo.

¹⁰Mitsahara ka aoka ho fantatrareo fa Izaho no Andriamanitra! Hisandratra amin’ny firenen-tsamihafa Aho, hisandratra amin’ny tany Aho.

¹¹Andriamanitra, Tompon’izao rehetra izao, no momba antsika, Andriamanitr’i Jakoba no fiarovana avo ho antsika. Fiatoana