Read La Bible en Malgache Salamo 48 Bible Online

Salamo 48 - La Bible en Malgache bible

Salamo 48

¹Tononkira. Salamo nataon’ny Koraìta. Lehibe NY TOMPO ka mendrika Azy ny fiderana ambony indrindra, ao an-tanànan’Andriamanitsika, ao an-tendrombohiny masina.

²Avo mahafinaritra sady fifalian’ny tany rehetra ny tendrombohitra Ziona* eo amin’ny ilany avaratra, tanànan’ny Mpanjaka lehibe.

³Andriamanitra ao an-dapa ao dia nanao izay hahafantarana Azy ho fiarovana avo.

⁴Fa indro, nivondrona ny mpanjaka maro, niara-nandroso avokoa izy.

⁵Nijery izy ka talanjona erỳ, very hevitra ka nalaky nandositra.

⁶Hovitra no nahazo azy teo, tahaka ny fanaintainan’ny vehivavy eo am-piterahana;

⁷tamin’ny rivotra avy any atsinanana no namakianao ny sambon’i Tarsisy.

⁸Araka izay efa rentsika no hitantsika tao an-tanànan’Andriamanitra, Tompon’izao rehetra izao, tao an-tanànan’Andriamanitsika: Mampitoetra azy mandrakizay Andriamanitra. Fiatoana

⁹Andriamanitra ô! Efa nieritreritra ny famindramponao tao anatin’ny tempolinao izahay.

¹⁰Tahaka ny anaranao, Andriamanitra ô, ny fiderana Anao hatrany amin’ny faran’ny tany. Feno fahamarinana ny tananao ankavanana.

¹¹Mifaly ny tendrombohitra Ziona ary miravoravo ny zanakavavin’i Joda noho ny fitsaranao.

¹²Manodidìna an’i Ziona ianareo; eny, mandehana manodidina azy; isao ny tilikambo fiambenany,

¹³jereo tsara ny mandany, diniho ny lapany, mba hotantarainareo amin’ny taranaka ho avy.

¹⁴Fa izany no Andriamanitra, Andriamanitsika mandrakizay doria; Izy no hitarika antsika mandra-pahafaty.