Read La Bible en Malgache Salamo 49 Bible Online

Salamo 49 - La Bible en Malgache bible

Salamo 49

¹Ho an’ny mpiventy hira. Salamo nataon’ny Koraìta. Mihainoa izao, ry firenena rehetra; atongilano ny sofinareo, ry mponina rehetra amin’izao tontolo izao,

²na ny kely, na ny lehibe, na ny manankarena, na ny mahantra!

³Hilaza fahendrena ny vavako ary hibitsika fahalalana ny foko.

⁴Hanongilana ny sofiko hihaino tononkalo aho ary hanazava teny saro-pantarina amin’ny alalan’ny lokanga.

⁵Nahoana aho no hatahotra amin’ny andro fahoriana nony manodidina ahy ny haratsiam-panahin’ny mpamingana?

⁶Matoky ny harenany ireny sady mirehareha amin’ny haben’ny fananany.

⁷Tsy misy olona mahavotra ny rahalahiny na afaka manome an’Andriamanitra izay vola hanavotany azy.

⁸Fa lafo ny takalon’ny ainy ka tsy takatra mandrakizay.

⁹Moa ho velona mandrakizay va izy ka tsy hiharan’ny fahalovana?

¹⁰Hita mantsy fa maty ihany ny olon-kendry ary ny adala sy ny kentrina koa dia samy lasa ka mamela ny fananany ho an’ny hafa.

¹¹Heveriny fa haharitra mandrakizay ny tranony ary hahatratra ny taranaka fara aman-dimby ny fonenany, satria izy no nanome anarana ny taniny.

¹²Nefa na dia manana voninahitra aza ny olona dia tsy maharitra; tahaka ny biby izay samy tsy maintsy ho faty izy.

¹³Izany no falehan’ny olona adala; finaritra amin’ny teniny ny taranany mandimby azy. Fiatoana

¹⁴Tahaka ny fanangona ondry no fanangona azy any amin’ny fitoeran’ny maty*, ny fahafatesana no mpiandry azy; hanosihosy azy ny olo-mahitsy nony maraina; ary ho levona ny bikany fa ny fitoeran’ny maty no fonenany.

¹⁵Fa Andriamanitra kosa no hanafaka ahy avy ao amin’ny fitoeran’ny maty, satria handray ahy Izy. Fiatoana

¹⁶Aza matahotra ianao raha misy olona tonga manankarena ka mitombo ny voninahitry ny tranony;

¹⁷fa tsy hitondra na inona na inona izy raha maty; tsy mba hidina hanaraka azy ny voninahiny.

¹⁸Afaka miarahaba tena izy raha mbola velona hoe: Midera anao ny olona fa manisy soa ny tenanao ianao.

¹⁹Mankany amin’ny razanao ianao, nefa ireny dia tsy hahita ny mazava intsony mandrakizay.

²⁰Izay olona manana voninahitra nefa tsy manan-tsaina dia tahaka ny biby izay samy tsy maintsy ho faty.