Read La Bible en Malgache Salamo 50 Bible Online

Salamo 50 - La Bible en Malgache bible

Salamo 50

¹Salamo nataon’i Asafa. Andriamanitra, NY TOMPO Andriamanitra, no miteny ka miantso ny tany hatrany amin’ny fiposahan’ny masoandro ka hatrany amin’ny filentehany.

²Avy ao Ziona* izay tanteraka amin’ny hatsaran-tarehy no amirapiratan’Andriamanitra.

³Avy Andriamanitsika ka tsy hangina; afo no mandevona eo alohany ary tafio-drivotra mahery no manodidina Azy.

⁴Miantso ny lanitra any ambony sy ny tany koa Izy mba hitsarany ny olony:

⁵Angony etỳ Amiko ny olona mahatoky Ahy dia izay manao fanekena Amiko amin’ny fanatitra!

⁶Holazain’ny lanitra ny fahamarinany satria Andriamanitra no Mpitsara. Fiatoana

⁷Mihainoa, ry oloko, fa hiteny Aho; ry Israely ô, mihainoa fa hanambara aminao Aho: Izaho no Andriamanitra, dia Andriamanitrao.

⁸Tsy ny fanatitrao no ananarako anao ary eo anatrehako mandrakariva ny fanatitra dorana manontolo natolotrao.

⁹Tsy haka vantotra ombilahy ao amin’ny tranonao Aho na osilahy ao amin’ny valanao.

¹⁰Fa Ahy ny biby rehetra any an’ala sy ny biby fiompy arivoarivo eny an-tendrombohitra;

¹¹fantatro ny vorona rehetra eny an-tendrombohitra ary Ahy avokoa ny zava-mihetsiketsika eny an-tsaha.

¹²Raha mba noana Aho dia tsy hilaza aminao fa Ahy izao tontolo izao sy izay rehetra eo aminy.

¹³Mihinana ny nofon’ny ombilahy va Aho na misotro ny ran’osilahy?

¹⁴Manolora fanati-pisaorana ho an’Andriamanitra ary efao amin’ny Avo Indrindra ny voadinao.

¹⁵Antsoy Aho amin’ny andro fahoriana dia hanafaka anao Aho ka hanome voninahitra Ahy ianao.

¹⁶Hoy Andriamanitra amin’ny ratsy fanahy: Nahoana ianao no mitanisa ny lalànako sy mitondra ny fanekeko eo am-bavanao?

¹⁷Nefa ianao dia mankahala fananarana sady arianao any ivohonao ny teniko!

¹⁸Raha mahita mpangalatra ianao dia faly hikambana aminy sady miray anjara amin’ny mpijangajanga.

¹⁹Avelanao hiteny ratsy ny vavanao sady mamorom-pitaka ny lelanao.

²⁰Mipetraka miteny ratsy ny rahalahinao ianao sady manendrikendrika ny zanaky ny reninao.

²¹Izany no nataonao nefa nangina ihany Aho. Dia noheverinao fa mitovy aminao ihany Aho nefa hananatra anao Aho ka handahatra izany eo imasonao.

²²Mihevera izany ankehitriny, ianareo izay manadino an’Andriamanitra, fandrao hamiravira Aho ka tsy hisy hanafaka.

²³Izay manolotra fanati-pisaorana no manome voninahitra Ahy; izay mitandrina ny lalany no hanehoako ny famonjen’Andriamanitra.