Read La Bible en Malgache Salamo 51 Bible Online

Salamo 51 - La Bible en Malgache bible

Salamo 51

¹Ho an’ny mpiventy hira. Salamo nataon’i Davida, fony i Natana mpaminany nankao aminy, rehefa naka an’i Batseba izy. Mamindrà fo amiko, Andriamanitra ô, araka ny fahasoavanao; araka ny haben’ny fiantranao, vonoy ny fahadisoako!

²Sasao madio aho mba ho afa-keloka ary diovy aho mba ho afa-pahotana!

³Fa tsaroako ny fahadisoako ary eo anatrehako mandrakariva ny fahotako.

⁴Taminao dia taminao ihany no nanotako ary izay ratsy eo imasonao no nataoko, mba ho marina Ianao raha miteny ary tsy hanan-tsiny Ianao raha mitsara.

⁵Indro, tamin’ny heloka no niterahana ahy ary tamin’ny fahotana no notorontoronina ahy ny reniko.

⁶Indro, fahamarinana ao am-po no sitrakao ary fahendrena ao amin’ny miafina no ampahafantarinao ahy!

⁷Diovy amin’ny hisopa* aho ho afa-pahotana dia hadio; sasao aho dia ho fotsy noho ny orampanala.

⁸Ampandreneso fifaliana sy faharavoana aho mba hifalian’ny taolana izay voavakivakinao.

⁹Afeno ny tavanao ny fahotako ary vonoy ny heloko rehetra.

¹⁰Amoròny fo madio aho, Andriamanitra ô, ary ampioreno fanahy vaovao ato anatiko.

¹¹Aza manary ahy hiala eo anatrehanao ary aza manaisotra ny Fanahinao Masina amiko.

¹²Ampodio amiko ny fifaliana amin’ny famonjenao ary tohàny fanahy mazoto aho!

¹³Dia hampianatra ny olon-diso ny lalanao aho, koa ny mpanota dia hiverina aminao.

¹⁴Vonjeo ho afaka amin’ny valin-dra aho, Andriamanitra ô, Andriamanitry ny famonjena ahy, dia hihoby ny fahamarinanao ny lelako.

¹⁵Tompo ô, sokafy ny molotro dia hanambara ny fiderana Anao ny vavako.

¹⁶Fa tsy fanatitra no sitrakao; raha izany dia nomeko ihany; ny fanatitra dorana manontolo dia tsy mahafaly Anao.

¹⁷Ny fanatitra ho an’Andriamanitra dia fanahy torotoro; ny fo torotoro sy mangorakoraka, Andriamanitra ô, tsy mba ataonao tsinontsinona.

¹⁸Manaova soa amin’i Ziona* araka ny fahasoavanao; ataovy ny mandan’i Jerosalema!

¹⁹Dia ho sitrakao ny fanatitra amim-pahamarinana sy ny fanatitra dorana manontolo ary ny fanatitra levonina amin’ny afo ary hanatitra vantotra ombilahy eo amin’ny alitaranao ny olona.