Read La Bible en Malgache Salamo 52 Bible Online

Salamo 52 - La Bible en Malgache bible

Salamo 52

¹Ho an’ny mpiventy hira. Maskila nataon’i Davida, fony tonga i Doega edomita ka nilaza tamin’i Saoly hoe: Tonga ao an-tranon’i Ahimeleka i Davida. Nahoana no mandoka tena amin’ny fanaovan-dratsy ianao, ry ilay mahery? Ny famindrampon’Andriamanitra dia maharitra amin’ny andro rehetra.

²Loza no foronin’ny lelanao tahaka ny hareza maranitra, ry mpanao fitaka!

³Tia ny ratsy noho ny tsara ianao ary ny lainga noho ny miteny ny marina. Fiatoana.

⁴Ny teny mandripaka rehetra no tianao, ry lela mamitaka.

⁵Andriamanitra kosa hanongana anao mandrakizay; hisambotra anao sy hanongotra anao hiala ao an-day Izy ary hamongotra anao tsy ho eo amin’ny tanin’ny velona. Fiatoana.

⁶Hijery ny marina dia hatahotra ka hihomehy azy hoe:

⁷Indro ny lehilahy izay tsy nanao an’Andriamanitra ho heriny fa natoky ny haben’ny harenany ka nikikitra tamin’ny faharatsiany.

⁸Fa izaho dia tahaka ny hazo oliva maitso ao amin’ny tranon’Andriamanitra. Matoky ny famindrampon’Andriamanitra mandrakizay doria aho.

⁹Hidera Anao mandrakizay aho satria Ianao no nanao izany, ary hanantena ny anaranao aho, eo anatrehan’ny olonao masina, satria tsara Ianao.