Read La Bible en Malgache Salamo 55 Bible Online

Salamo 55 - La Bible en Malgache bible

Salamo 55

¹Ho an’ny mpiventy hira. Hampiarahina amin’ny valiha. Maskila nataon’i Davida. Mihainoa ny vavaka ataoko, Andriamanitra ô, ary aza miery amin’ny fitarainako!

²Henoy aho ka valio! Miriorio ny eritreritro ka mitoloko aho

³noho ny feon’ny fahavalo sy ny fampahorian’ny ratsy fanahy, fa manjera loza amiko ireny ary amin’ny fahatezerana no ankahalany ahy.

⁴Mangorohoro ato anatiko ny foko ary mamely ahy ny tahotra ny fahafatesana.

⁵Tahotra sy hovitra no mahazo ahy ary manafotra ahy ny horohoro

⁶ka hoy aho: Enga anie ka hanana elatra tahaka ny voromailala aho! Dia hanidina aho ka hahita izay hitoerako.

⁷Eny, handositra lavitra aho ka hitoetra any an-tany efitra. Fiatoana.

⁸Handeha haingana aho hamonjy fialofana mba tsy ho azon’ny tafio-drivotra sy ny ranonoram-baratra.

⁹Aringano izy ary saratsaraho ny fiteniny, Tompo ô! Fa mahita loza sy adilahy ao an-tanàna aho.

¹⁰Hodidininy andro aman’alina eny ambonin’ny mandany io; heloka sy fampahoriana no ao aminy;

¹¹faharavana no ao anatiny ary ny fitaka sy ny fanangolena dia tsy mba miala amin’ny lalambeny.

¹²Fa tsy fahavalo no nanaratsy ahy, fa raha izany dia ho niaritra ihany aho; tsy olona nankahala ahy no nanandra-tena namely ahy, fa raha izany dia ho niery azy aho.

¹³Fa ianao izay lehilahy mitovy saranga amiko, namako sy tena sakaizako,

¹⁴dia isika izay nifankamamy resaka ka niara-nandeha tamin’ny maro ho ao amin’ny tranon’Andriamanitra!

¹⁵Aoka hanampoka azy ny fahafatesana ary aoka hidina velona any amin’ny fitoeran’ny maty* izy! Fa ratsy no ao amin’ny fonenany, ao afovoany ao.

¹⁶Raha izaho dia Andriamanitra no antsoiko ary NY TOMPO no hamonjy ahy.

¹⁷Hariva sy maraina ary mitataovovonana no itarainako sy itolokoako dia hihaino ny feoko Izy

¹⁸ka hanavotra ahy ho amin’ny fiadanana hahafahako amin’ny adin’ireny amiko, fa maro no miady amiko.

¹⁹Hihaino Andriamanitra izay mipetraka amin’ny sezafiandrianany hatrizay hatrizay. Fiatoana. Hamaly ireo olona tsy miova toetra Izy, dia izay tsy matahotra an’Andriamanitra.

²⁰Nanatsotra ny tanany hamely izay nihavana taminy izy; namadika ny fanekeny izy;

²¹malambo noho ny rononomandry ny vavany, kanjo ady no ao am-pony; malefaka noho ny diloilo ny teniny, kanjo sabatra voatsoaka ireny.

²²Apetraho amin’NY TOMPO ny entanao ary Izy no hiantoka anao; tsy havelany hangozohozo mandrakizay ny marina.

²³Fa Ianao, Andriamanitra ô, no hampidina ireo any an-davaka lalina; ny mpandatsa-dra sy mpamitaka dia tsy hahatratra ny antsasaky ny androny; fa izaho kosa dia hatoky Anao.