Read La Bible en Malgache Salamo 56 Bible Online

Salamo 56 - La Bible en Malgache bible

Salamo 56

¹Ho an’ny mpiventy hira. Al-ionat elem rehokim. Miktama nataon’i Davida, fony nisambotra azy tany Gata ny Filistina. Mamindrà fo amiko, Andriamanitra ô, fa misafoaka manenjika ahy ny olona. Miady amiko mandrakariva izy ka mampahory ahy.

²Misafoaka manenjika mandrakariva ny mpampahory ahy; maro tokoa no mirehareha miady amiko!

³Amin’ny andro atahorako no itokiako Anao.

⁴Andriamanitra no deraiko noho ny teniny; Andriamanitra no itokiako ka tsy mba hatahotra aho. Inona no hataon’ny nofo amiko?

⁵Mamily ny teniko mandrakariva ireny. Ny heviny rehetra dia ny hanisy ratsy ahy ihany.

⁶Mioko izy, mitily izy, mitsongo-dia ahy izy, satria mikendry ny aiko.

⁷Amin’izany faharatsiany izany, moa hisy hahafahany va? Aripaho amin’ny fahatezeranao ny firenena, Andriamanitra ô!

⁸Manisa ny firenireneko Ianao; ataovy an-tavoahanginao ny ranomasoko. Tsy ao amin’ny bokinao va ireny?

⁹Amin’izay dia hiamboho ny fahavaloko, amin’ny andro iantsoako Anao. Izao dia fantatro fa momba ahy Andriamanitra.

¹⁰Andriamanitra no deraiko noho ny teniny; NY TOMPO no deraiko noho ny teniny.

¹¹Andriamanitra no itokiako ka tsy mba hatahotra aho. Inona no hataon’ny olona amiko?

¹²Nivoady taminao aho, Andriamanitra ô, dia hanolotra fanati-pisaorana ho Anao.

¹³Fa efa nanafaka ahy tamin’ny fahafatesana Ianao; eny, nanafaka ny tongotro Ianao mba tsy ho solafaka, mba handehanako eo anatrehan’Andriamanitra amin’ny fahazavan’ny velona.