Read La Bible en Malgache Salamo 57 Bible Online

Salamo 57 - La Bible en Malgache bible

Salamo 57

¹Ho an’ny mpiventy hira. Al-tashet. Miktama nataon’i Davida tamin’ny nandosirany an’i Saoly tao anaty zohy. Mamindrà fo amiko, Andriamanitra ô, mamindrà fo amiko! Fa Aminao no ialofako. Eny, ao amin’ny aloky ny elatrao no ialofako mandra-pahalasa ny loza.

²Hitaraina amin’Andriamanitra Avo Indrindra aho, dia amin’Andriamanitra izay manatanteraka ny asany ho ahy.

³Haniraka famonjena ho ahy avy any an-danitra Izy raha mbola miteny ratsy ny olona izay misafoaka manenjika ahy. Fiatoana. Eny, Andriamanitra haniraka ny famindrampony sy ny fahamarinany.

⁴Eo afovoan’ny liona aho; mandry eo amin’ny mpihinana olona aho; lefona sy zana-tsipìka ny nifiny ary sabatra maranitra ny lelany.

⁵Misandrata any ambonin’ny lanitra Ianao, Andriamanitra ô! Aoka ho ambonin’ny tany rehetra ny voninahitrao!

⁶Namela fandrika harato haningotra ny diako izy ary nitanondrika aho; nihady lavaka teo anoloako izy, kanjo ny tenany ihany no latsaka ao anatiny. Fiatoana.

⁷Tafatoetra ny foko, Andriamanitra ô, eny, tafatoetra ny foko; hihira sy hankalaza aho.

⁸Mifohaza, ry voninahitro! Mifohaza, ry valiha sy lokanga! Hampifoha ny maraina aho.

⁹Hidera Anao eny amin’ny firenena aho, Tompo ô, hankalaza Anao eny amin’ny fokom-pirenena aho.

¹⁰Fa lehibe mihatra amin’ny lanitra ny famindramponao ary mihatra amin’ny rahona ny fahamarinanao.

¹¹Misandrata any ambonin’ny lanitra Ianao, Andriamanitra ô! Aoka ho ambonin’ny tany rehetra ny voninahitrao!