Read La Bible en Malgache Salamo 60 Bible Online

Salamo 60 - La Bible en Malgache bible

Salamo 60

¹Ho an’ny mpiventy hira. Al-shoshan edot. Miktama nataon’i Davida hampianarana, fony izy nanafika an’i Mezopotamia sy Arama-Zoba, tamin’ny niverenan’i Joaba ka namelezany ny Edomita roa arivo sy iray alin-dahy teo amin’ny Lohasahantsira. Andriamanitra ô, efa nanary sy nampihahaka anay Ianao, efa tezitra Ianao, velombelomy izahay!

²Efa nampihorohoro ny tany Ianao ka nampitresaka azy. Amboary izay rava aminy fa mihozongozona izy!

³Efa nampahita ny olonao zava-tsarotra Ianao ary efa nampisotro anay divay mampiraikiraiky.

⁴Efa notoloranao faneva ny matahotra Anao mba hatsangany noho ny fahamarinana. Fiatoana.

⁵Mba hahafahan’ny malalanao dia vonjeo amin’ny tananao ankavanana aho ka valio!

⁶Andriamanitra niteny tamin’ny fahamasinany hoe: Handresy Aho ka hizara an’i Sekema ary ny lohasahan’i Sokota dia horefesiko.

⁷Ahy i Gileada, Ahy koa i Manase; aron’ny lohako i Efraima; tehim-panjakako i Joda.

⁸I Moaba dia fitoeran-drano fisasana ho Ahy; eo amin’i Edoma no anipazako ny kapako; mihorakoraha hiady Amiko, ry tanin’ny Filistina!

⁹Iza no hitondra ahy ho any amin’ny tanàna mafy? Iza no hitarika ahy hatrany Edoma?

¹⁰Tsy Ianao va, Andriamanitra ô, izay nanary anay? Sady tsy nandeha niaraka tamin’ny antokon’ny miaramilanay, Andriamanitra ô?

¹¹Vonjeo amin’ny mpandrafy izahay! Fa zava-poana ny famonjena ataon’ny olona.

¹²Amin’Andriamanitra no hahavitantsika fandresen-dehibe; fa Izy no hanitsakitsaka ny fahavalontsika.