Read La Bible en Malgache Salamo 62 Bible Online

Salamo 62 - La Bible en Malgache bible

Salamo 62

¹Ho an’ny mpiventy hira. Al-Jedotona. Salamo nataon’i Davida. Amin’Andriamanitra tokoa no iantombenan’ny fanahiko; avy Aminy ny famonjena ahy.

²Izy tokoa no vatolampiko sy famonjena ahy. Izy tokoa no fiarovana avo ho ahy ka tsy hangozohozo loatra aho.

³Mandra-pahoviana no hirohotanareo hamely olona sy handrodananareo rehetra azy toy ny manda mirona sy ny rova mihozongozona?

⁴Misaina hanongana azy hiala amin’ny toerany ambony ireny; lainga no ifaliany. Misaotra amin’ny vavany izy nefa manozona amin’ny fony. Fiatoana.

⁵Miantombena amin’Andriamanitra tokoa ianao, ry fanahiko, fa Izy no antenaiko.

⁶Izy tokoa no vatolampiko sy famonjena ahy, fiarovana avo ho ahy ka tsy mba hangozohozo aho.

⁷Andriamanitra no iankinan’ny famonjena ahy sy ny voninahitro; ny vatolampiko mafy sy ny fialofako dia ao amin’Andriamanitra.

⁸Matokia Azy mandrakariva ianareo, ry olona! Loary eo anatrehany ny fonareo! Andriamanitra no fialofana ho antsika. Fiatoana.

⁹Entona fotsiny ny zanak’i Adama ary lainga ny zanak’olombelona; raha atao amin’ny mizana izy rehetra dia maivana noho ny entona.

¹⁰Aza miankina amin’ny fanaovana an-keriny ary aza manantena ny zavatra azo tamin’ny halatra; raha mitombo ny harena dia aza anorenana ny fonareo.

¹¹Indray mandeha no nitenenan’Andriamanitra; indroa no nandrenesako hoe: An’Andriamanitra ny hery.

¹²Anao koa, Tompo ô, ny famindrampo, fa Ianao no mamaly ny olona rehetra araka ny asany avy.