Read La Bible en Malgache Salamo 63 Bible Online

Salamo 63 - La Bible en Malgache bible

Salamo 63

¹Salamo nataon’i Davida, fony izy tany an-tany efitr’i Joda. Andriamanitra ô, Andriamanitro Ianao; mitady Anao fatratra aho, mangetaheta Anao ny fanahiko, maniry Anao ny nofoko, eto amin’ny tany maina sy mangentana tsy misy rano.

²Izany no ijereko Anao ao amin’ny fitoerana masina, mba hahitako ny herinao sy ny voninahitrao.

³Fa tsara noho ny aina ny famindramponao; ny molotro dia hidera Anao.

⁴Izany no hisaorako Anao raha mbola velona koa aho; amin’ny anaranao no hanandratako ny tanako.

⁵Toy ny voky tsoka sy tavy no hahavokisan’ny fanahiko ary amin’ny molotra ravoravo no hideran’ny vavako Anao.

⁶Rehefa mahatsiaro Anao eo am-pandrianako aho dia mieritreritra Anao amin’ny fotoam-piambenana alina.

⁷Fa famonjena ahy Ianao ary ao amin’ny aloky ny elatrao no hihobiako.

⁸Mifikitra Aminao ny fanahiko; manohana ahy ny tananao ankavanana.

⁹Fa ireny dia mitady ny aiko ka mampidi-doza amin’ny tenany; hiditra any ambanin’ny tany izy;

¹⁰hatolotra ho amin’ny herin’ny sabatra izy; ho anjaran’ny amboahaolo izy.

¹¹Fa ny mpanjaka dia hifaly amin’Andriamanitra; ho ravoravo izay rehetra mianiana aminy, fa hakombona ny vavan’izay rehetra mandainga.