Read La Bible en Malgache Salamo 65 Bible Online

Salamo 65 - La Bible en Malgache bible

Salamo 65

¹Ho an’ny mpiventy hira. Salamo nataon’i Davida. Tononkira. Ho Anao ny fahanginana sy ny fiderana, Andriamanitra any Ziona* ô, ary Aminao no anefana ny voady.

²Ry Mpihaino vavaka ô, Ianao no hohatonin’ny nofo rehetra.

³Ny zava-mahameloka ahy dia mihoatra noho izay zakako; nefa Ianao no mamela ny fahadisoanay.

⁴Sambatra izay fidinao sy ampanatoninao mba hitoetra eo an-kianjanao! Ho voky ny zava-tsoa ao amin’ny tranonao izahay, dia ny zava-masina ao amin’ny tempolinao.

⁵Zava-mahatahotra no ataonao amin’ny fahamarinana ho valin’ny vavakay, ry Andriamanitry ny famonjena anay ô, ry tokin’ny faran’ny tany rehetra sy ny ranomasina eny lavitra eny!

⁶Mampiorina ny tendrombohitra amin’ny heriny Izy, misikina fahatanjahana Izy.

⁷Mampitsahatra ny firohondrohon’ny onjan-dranomasina sy ny fitabataban’ny firenena Izy.

⁸Dia matahotra noho ny famantarana ataonao ny mponina any am-paran’ny tany; fenoinao hoby ny any amin’ny fiposahan’ny maraina sy ny hariva.

⁹Mamangy ny tany Ianao ka mahamando azy; mampahavokatra azy betsaka Ianao; ny onin’Andriamanitra dia tondra-drano; manomana vary ho an’ny olona Ianao. Izany no fanomananao ny tany.

¹⁰Mahampoka ny tany voaasa Ianao ka mampiravona azy; ranonorana mivatravatra no amontosanao azy; mitahy ny fitsimohany Ianao.

¹¹Satrohanao voninahitra ny taonan’ny fitahianao; ny dianao dia mitete menaka.

¹²Vonton-drano ny fiandrasana ondry any an-tany efitra ary misikina fifaliana ny havoana.

¹³Rakotra ondry ny saha ary voasarona vary ny lohasaha: Mihoby izy; eny, mihira koa.