Read La Bible en Malgache Salamo 68 Bible Online

Salamo 68 - La Bible en Malgache bible

Salamo 68

¹Ho an’ny mpiventy hira. Salamo nataon’i Davida. Tononkira. Aoka hitsangana Andriamanitra ka hiely ny fahavalony ary aoka izay mankahala Azy handositra ny tavany.

²Tahaka ny fanely setroka no fanelinao azy; tahaka ny fiempon’ny savoka eo anoloan’ny afo no aoka hahalevonan’ny ratsy fanahy eo anatrehan’Andriamanitra.

³Fa mifaly ny marina; eny, ravoravo eo anatrehan’Andriamanitra izy, mihoby sy mifaly izy!

⁴Mihirà ho an’Andriamanitra, mankalazà ny anarany! Manamboara lalana ho an’Izay mitaingina ny kalesiny mamakivaky ny tany efitra! NY TOMPO no anarany. Miravoravoa eo anatrehany!

⁵Rain’ny kamboty sy mpanome rariny ny mpitondratena Andriamanitra ao amin’ny fonenany masina.

⁶Andriamanitra mampitoetra an-trano izay manirery, mamoaka ny mpifatotra ho amin’ny fanambinana Izy; fa ny maditra irery no hitoetra amin’ny tany karankaina.

⁷Andriamanitra ô, fony Ianao nandeha teo alohan’ny olonao ka namakivaky ny tany efitra Fiatoana

⁸dia nihorohoro ny tany ary nitaitaika ny lanitra tamin’ny fanatrehan’Andriamanitra, dia irỳ Sinay irỳ izany, tamin’ny fanatrehan’Andriamanitra, Andriamanitry ny Israely.

⁹Ranonoram-pitahiana no nalatsakao tamin’ny lovanao, Andriamanitra ô! Ary raha kotsa izy dia novelombelominao.

¹⁰Ny olonao dia monina ao; mamponina ny ory araka ny fahasoavanao Ianao, Andriamanitra ô.

¹¹Ny Tompo manome teny ary ny vehivavy mpilaza soa dia antokony lehibe:

¹²Ireo mpanjaka be miaramila dia vaky mandositra ary ny vehivavy izay mitoetra ao an-trano no mizara ny babo.

¹³Raha mandry any amin’ny vala ianareo, ny ela-boromailala dia miravaka volafotsy ary ny volony dia miravaka volamena.

¹⁴Tamin’ny nanelezan’ny Tsitoha ny mpanjaka maro dia latsaka tao Zalmona ny orampanala.

¹⁵Tendrombohitr’Andriamanitra ny tendrombohitr’i Basana. Tendrombohitra maro tampona ny tendrombohitr’i Basana.

¹⁶Ry tendrombohitra maro tampona, nahoana ianareo no mialona ny tendrombohitra izay tian’Andriamanitra itoerana? Eny, hitoetra ao mandrakizay NY TOMPO.

¹⁷Ny kalesin’Andriamanitra dia an’arivo sy an’alinalina; Ny Tompo no eo amin’ireo; i Sinay dia eo amin’ny fitoerana masina.

¹⁸Niakatra ho any amin’ny avo Ianao ka nitondra babo; nandray fanomezana teo amin’ny olombelona Ianao; eny, teo amin’ny maditra aza mba hitoeran’NY TOMPO Andriamanitra any[3].

¹⁹Isaorana isanandro isanandro anie ny Tompo; raha misy mahavesatra antsika dia Andriamanitra no famonjena antsika. Fiatoana.

²⁰Andriamanitra no Andriamanitry ny famonjena ho antsika; an’NY TOMPO Andriamanitra ny fanafahana amin’ny fahafatesana.

²¹Fa Andriamanitra manapotika ny lohan’ny fahavalony, dia ny tampon-doha lava volo an’izay mandroso amin’ny fahadisoany.

²²Hoy ny Tompo: Hampody ny any Basana Aho; hampody ny avy amin’ny ranomasina lalina Aho,

²³mba hampihosenanao ra ny tongotrao ary ny fahavalo ho anjaran’ny lelan’ny amboanao.

²⁴Hita ny filaharan’ny olonao, Andriamanitra ô, dia ny fiavianao, Andriamanitro, Mpanjakako, ao amin’ny fitoerana masina.

²⁵Mialoha ny mpihira, manaraka ny mpitendry valiha, eo afovoan’ny zatovovavy mively ampongatapaka.

²⁶Misaora an’Andriamanitra eo amin’ny fiangonana; eny, misaora NY TOMPO, ianareo avy amin’ny loharanon’ny Israely.

²⁷Indrỳ i Benjamina izay zandriny indrindra ary mitari-dalana azy, ny antokon’ny mpanapaka ny Joda*, ny mpanapaka ny Zebolona sy ny mpanapaka ny Naftaly.

²⁸Andriamanitrao no nandidy mba hahery ianao. Andriamanitra ô! Asehoy ny herinao amin’izay nataonao ho anay,

²⁹avy ao amin’ny tempolinao eo an-tampon’i Jerosalema izay itondran’ny mpanjaka maro fanatitra ho Anao.

³⁰Teneno mafy ny biby eny anaty zozoro sy ny fivorian’ny ombilahy mbamin’ireo andian-janak’omby, dia izay miankohoka manolotra anjam-bolafotsy. Aelezo ny olona tia ady.

³¹Ho avy ny tremalahin’i Ejipta; I Kosy dia halaky hananty tanana amin’Andriamanitra.

³²Ianareo fanjakana ambonin’ny tany, mihirà ho an’Andriamanitra, mankalazà ny Tompo. Fiatoana.

³³Ilay mitaingina ny lanitry ny lanitra izay hatry ny fahagola, indro, mamoaka ny feony Izy, dia feo mahery.

³⁴Ekeo ho an’Andriamanitra ny hery; ambonin’ny Israely ny voninahiny ary ny heriny dia eny amin’ny rahona.

³⁵Mahatahotra Ianao, Andriamanitra ô, ao amin’ny fitoeranao masina; Andriamanitry ny Israely no manome hery sy tanjaka ho an’ny firenena. Isaorana anie Andriamanitra.