Read La Bible en Malgache Salamo 69 Bible Online

Salamo 69 - La Bible en Malgache bible

Salamo 69

¹Ho an’ny mpiventy hira. Al-shoshanim. Nataon’i Davida. Vonjeo aho, Andriamanitra ô, fa efa mihatra amin’ny aiko ny rano.

²Milentika amin’ny fotaka mandrevo aho ka tsy misy hifaharana; efa miditra amin’ny rano lalina aho ka mandifotra ahy ny riaka.

³Sasatry ny mitaraina aho, maimay ny tendako; pahina ny masoko raha miandry an’Andriamanitro aho.

⁴Maro noho ny volon-dohako ny isan’izay mankahala ahy tsy amin’antony. Mahery izay ta hahafaty ahy, dia ny fahavaloko tsy amin’antony; mampanonitra ahy izay tsy nalaiko izy.

⁵Andriamanitra ô, Ianao mahalala ny hadalako ary ny heloko tsy mba miafina Aminao.

⁶Aoka tsy ho menatra noho ny amiko izay olona miandry Anao, RY TOMPO, Andriamanitra Tompon’izao rehetra izao ô! Aoka tsy ho very hevitra noho ny amiko izay olona mitady Anao, ry Andriamanitry ny Israely ô.

⁷Fa noho ny Aminao no itondrako latsa; safotry ny henatra ny tavako.

⁸Efa tonga vahiny amin’ny rahalahiko aho; eny, tonga olon-ko azy amin’ny zanak’Ineny aho.

⁹Fa ny firehetako ny amin’ny tranonao no naha ritra aina ahy ary ny latsa nataon’izay nandatsa Anao dia nihatra tamiko.

¹⁰Nitomany sady nifady hanina aho, dia natao latsa ho ahy izany.

¹¹Akanjo fisaonana no nataoko fitafiako, dia efa ambentinteny tamin’ireny aho.

¹²Miresaka ahy izay mipetraka eo am-bavahady ary ataon’ny mpisotro toaka an-kira aho.

¹³Fa izaho dia hivavaka Aminao amin’ny andro fankasitrahana, TOMPO ô, dia Aminao, Andriamanitra ô, noho ny haben’ny famindramponao! Valio aho araka ny hamarinan’ny famonjenao!

¹⁴Afaho amin’ny fotaka aho ka aza avela hilentika! Vonjeo amin’izay mankahala ahy sy amin’ny rano lalina aho!

¹⁵Aza avela hanafotra ahy ny rano mandriaka, na hitelina ahy ny lalina, ary aza avela hikatom-bava amiko ny lavaka fantsakana!

¹⁶Valio aho, TOMPO ô, fa tsara ny famindramponao; todiho aho, araka ny haben’ny antranao

¹⁷ary aza manafina ny tavanao amin’ny mpanomponao! Fa azom-pahoriana aho, koa faingàna hamaly ahy Ianao!

¹⁸Hatòny aho ka avoty! Eny, vonjeo aho noho ny ataon’ny fahavaloko!

¹⁹Ianao no mahalala ny latsa mihatra amiko sy ny fahamenarako ary ny fahafaham-boninahitro; eo anatrehanao ny mpandrafy ahy rehetra.

²⁰Ny latsa dia nanorotoro ny foko ka reraka aho; niandry antra aho nefa tsy nisy, ary mpampionona nefa tsy nahita.

²¹Fa zava-mangidy no nomeny hohaniko ary vinaingitra no natolony ahy hosotroina raha nangetaheta aho.

²²Aoka ho tonga fandrika ho azy ny latabatra eo anoloany ary ho tonta ho azy ny fiadanam-piainany!

²³Aoka ho jamba ny masony mba tsy hahita ary ampangozohozoy mandrakariva ny lamosiny!

²⁴Aidino aminy ny fahatezeranao ary aoka hahatratra azy ny firehetan’ny fahaviniranao!

²⁵Aoka ho foana ny tobiny; aza avela hisy hitoetra ao an-dainy!

²⁶Fa izay efa nasianao no nenjehiny ary ny fahararian’ny efa voatsindronao dia lazalazainy.

²⁷Aoka hiampy ny helony ary aoka tsy hiditra amin’ny fahamarinanao izy!

²⁸Aoka hovonoina tsy ho eo amin’ny bokin’ny velona ny anarany ary aoka izy tsy hosoratana miaraka amin’ny marina!

²⁹Fa izaho dia ory sy mijaly, Andriamanitra ô; aoka ny famonjenao no hanandratra ahy!

³⁰Hankalaza ny anaran’Andriamanitra amin’ny hira aho ary hidera Azy amin’ny fisaorana.

³¹Fa izany dia ho sitraky NY TOMPO mihoatra noho ny vantotra ombilahy izay manan-tandroka sady mivaky kitro.

³²Hahita izany ny mpandefitra ka ho faly; aoka ho velona ny fonareo, ry mpitady an’Andriamanitra.

³³Fa mihaino ny mahantra NY TOMPO, ary tsy mba hataony tsinontsinona ny olony mifatotra.

³⁴Aoka hidera Azy ny lanitra sy ny tany, ny ranomasina sy izay rehetra mihetsika ao aminy!

³⁵Fa Andriamanitra hamonjy an’i Ziona* sady hanangana ny tanànan’i Joda* ary hitoetra ao ny olony ka ho tompony,

³⁶dia handova azy ny taranaky ny mpanompony ary hitoetra ao izay tia ny anarany.