Read La Bible en Malgache Salamo 7 Bible Online

Salamo 7 - La Bible en Malgache bible

Salamo 7

¹Fitarainana nataon’i Davida. Nohirainy ho an’NY TOMPO noho ny tenin’i Kosy benjaminita. RY TOMPO Andriamanitro ô, Ianao no ialofako; vonjeo aho amin’izay rehetra manenjika ahy ka afaho,

²fandrao viravirainy tahaka ny fanaon’ny liona ny fanahiko ary kepokepohiny ka tsy misy mamonjy!

³RY TOMPO Andriamanitro ô, raha nanao izany tokoa aho, raha nisy heloka teto an-tanako,

⁴raha namaly ratsy izay tsara fihavanana tamiko aho, na nandroba izay nampahory ahy tsy amin’antony,

⁵dia aoka hanenjika ahy ny fahavalo ka hahatratra ahy; eny, aoka izy hanitsaka ny aiko amin’ny tany sady hampandry ny voninahitro amin’ny vovoka. Fiatoana

⁶TOMPO ô, mitsangàna amin’ny fahatezeranao. Misandrata hisakana ny fisafoaky ny mpampahory ahy ary mifohaza hanampy ahy, fa didy marina no navoakanao.

⁷Aoka ny firenena maro hivory manodidina Anao ary miverena ho eo amin’ny avo eo amboniny Ianao.

⁸NY TOMPO mitsara ny firenena. TOMPO ô, tsarao aho araka ny fahamarinako sy ny tsy fananako tsiny.

⁹Mba atsaharo ny ratsy ataon’ny ratsy fanahy ary ampitoero kosa ny marina, fa Ianao dia Andriamanitra marina mizaha toetra ny fo sy ny voa.

¹⁰Ny ampingako dia ao amin’Andriamanitra, Mpamonjy ny mahitsy fo.

¹¹Mpitsara marina Andriamanitra, eny, Andriamanitra izay tezitra isanandro.

¹²Raha tsy ibebahana Izy dia handranitra ny sabany; efa manenjana ny tsipìkany Izy ka manomana azy.

¹³Izany no anomanany fiadiana mahafaty; ataony mirehitra ny zana-tsipìkany.

¹⁴Indro, efa marary hiteraka zava-poana ireo; eny, mitondra fampahoriana ao an-kibony izy ary miteraka lainga.

¹⁵Mihady lavaka izy ka manalalaka izany ary latsaka ao anatin’ny lavaka nataony ihany izy.

¹⁶Mitsingerina ho eo an-dohany ihany ny fampahoriana ataony ary eo an-tampon-dohany ihany no ianjeran’ny loza nataony.

¹⁷Hidera NY TOMPO araka ny fahamarinany aho ary hankalaza ny anaran’NY TOMPO Avo Indrindra.