Read La Bible en Malgache Salamo 72 Bible Online

Salamo 72 - La Bible en Malgache bible

Salamo 72

¹Nataon’i Solomona. Andriamanitra ô, omeo ny mpanjaka ny fitsaranao ary omeo ny zanaky ny mpanjaka ny fahamarinanao!

²Aoka izy hitsara ny olonao amin’ny fahamarinana ary ny malahelonao amin’ny fahitsiana.

³Ny tendrombohitra dia hahavokatra fiadanana ho an’ny olona; eny, ny havoana koa, amin’ny fahamarinana.

⁴Aoka izy hitsara ny ory eo amin’ny vahoaka sy hamonjy ny zanaky ny mahantra ary hanorotoro ny mpampahory.

⁵Hatahotra anao ny olona raha mbola maharitra koa ny masoandro sy ny volana hatramin’ny taranaka fara aman-dimby.

⁶Hidina tahaka ny ranonorana amin’ny saha voajinja izy, tahaka ny ranonorana mivatravatra amin’ny tany.

⁷Ny marina dia hitrebona amin’ny androny ary ho be ny fiadanana mandra-paha tsy hisy volana intsony.

⁸Hanapaka hatrany amin’ny ranomasina iray ka hatrany amin’ny ranomasina iray izy ary hatrany amin’ny ony Eofrata ka hatrany amin’ny faran’ny tany.

⁹Ny mponina any an-tany efitra dia handohalika eo anatrehany ary ny fahavalony dia hilelaka ny vovoka.

¹⁰Ny mpanjakan’i Tarsisy sy ny nosy dia handoa hetra; ny mpanjakan’i Sheba sy Seba dia hanatitra fanomezana.

¹¹Ny mpanjaka rehetra dia hiankohoka eo anatrehany ary ny firenena rehetra dia hanompo azy.

¹²Fa hamonjy ny mahantra mitaraina sy ny ory tsy manan-kamonjy izy;

¹³hiantra ny madinika sy ny mahantra izy ary hamonjy ny ain’ny mahantra.

¹⁴Hanavotra azy amin’ny fampahoriana sy ny fanaovana an-keriny izy ary ho sarobidy eo imasony ny rany.

¹⁵Aoka ho velona izy ary aoka homena volamena avy any Sheba izy! Aoka hisy fifonana ho azy mandrakariva ary aoka hotsofindrano isanandro izy!

¹⁶Hahavoka-bary betsaka ny tany na dia any an-tampon’ny tendrombohitra aza, hirondrona tahaka ny any Libanona ny fahavokarany, ary hidokadoka tahaka ny ahitra amin’ny tany ny ao an-tanàna.

¹⁷Ho mandrakizay ny anarany; raha mbola maharitra koa ny masoandro dia haharitra ny anarany. Izy no ho fitahiana ny olona; ny firenena rehetra dia hanao azy hoe sambatra.

¹⁸Isaorana anie NY TOMPO Andriamanitra, Andriamanitry ny Israely; Izy irery ihany no manao fahagagana!

¹⁹Isaorana mandrakizay anie ny anarany malaza! Ary aoka ny tany rehetra ho henika ny voninahiny! Amena! Eny, Amena!

²⁰Tapitra ny vavaka nataon’i Davida zanak’i Jese.