Read La Bible en Malgache Salamo 73 Bible Online

Salamo 73 - La Bible en Malgache bible

Salamo 73

¹Salamo nataon’i Asafa Eny, marina tokoa fa Andriamanitra dia tsara amin’ny Israely, dia amin’izay madio fo.

²Fa izaho dia saika nibolasitra ny tongotro; saika solafaka ny diako

³satria nialona ny mpirehareha aho raha nahita ny fiadanan’ny ratsy fanahy.

⁴Fa tsy mba misy fanaintainana amin’ny fahafatesany ary fatratra ny heriny.

⁵Tsy mba misy manavesatra azy tahaka ny olona rehetra ary tsy mba azom-pahoriana tahaka ny olon-kafa izy.

⁶Noho izany dia ny fireharehana no rojo iambozonany ary ny fanaovana an-keriny no lamba itafiany.

⁷Bongon-tavy ny masony; mihoa-pampana ny hevitra avy ao am-pony.

⁸Manazimbazimba izy ka miresaka fampahoriana sy fanaovana an-keriny; avo vava izy;

⁹manao vava manakatra ny lanitra izy ary ny lelany dia mandeha mitety ny tany.

¹⁰Izany no itodihan’ny olony hankany aminy. Ranobe no gohin’ireny

¹¹ka hoy izy: Hataon’Andriamanitra ahoana no fahalala? Ary moa mba misy fahalalana ao amin’ny Avo Indrindra?

¹²Indro ireny dia olona ratsy fanahy; miadana mandrakariva izy ka mitombo harena.

¹³Foana mihitsy ny nanadiovako ny foko sy ny nanasako ny tanako tamin’ny tsy fananan-tsiny.

¹⁴Voakapoka mandritra ny andro aho ary faizina isa-maraina.

¹⁵Raha toa ka niteny aho hoe: Hiteny sahala aminy aho, dia ho namitaka ireo zanakao.

¹⁶Dia nieritreritra aho mba hahafantatra izany zavatra izany, kanjo sarotra tamiko izany,

¹⁷mandra-piditro tao amin’ny fitoera-masin’Andriamanitra ka azoko an-tsaina ny zavatra miandry azy.

¹⁸Eo amin’izay mahasolafaka tokoa no ametrahanao azy ary aripakao ho ringana izy.

¹⁹Akory izay! Rava indray mipy maso izy, levona izy, matin’ny zava-mahatahotra!

²⁰Tahaka ny anaovan’ny olona ny nofiny ho tsinontsinona dia tahaka izany, Tompo ô, no anaovanao ny endrik’ireny ho tsinontsinona, rehefa mifoha Ianao.

²¹Raha lotika ny foko ka voatsindrona ny voako

²²dia ketrina aho ka tsy nahalala; eny, toy ny biby teo anatrehanao aho.

²³Nefa izaho dia eo Aminao ihany mandrakariva, mihazona ny tanako havanana Ianao.

²⁴Ny saina omenao no itarihanao ahy ary rehefa afaka izany dia horaisinao ho amin’ny voninahitra aho.

²⁵Iza no ahy any an-danitra? Ary tsy misy etỳ ambonin’ny tany iriko tahaka Anao.

²⁶Na dia levona aza ny nofoko sy ny foko dia mbola vatolampin’ny foko sy anjarako mandrakizay ihany Andriamanitra.

²⁷Fa indro, very izay lavitra Anao; aringanao izay rehetra mijangajanga mahafoy Anao.

²⁸Fa ny amiko dia ny manakaiky an’Andriamanitra no mahatsara ahy; Ianao, RY TOMPO Andriamanitra ô, no nataoko fialofana, mba hitantarako ny asanao rehetra.