Read La Bible en Malgache Salamo 74 Bible Online

Salamo 74 - La Bible en Malgache bible

Salamo 74

¹Maskila nataon’i Asafa. Andriamanitra ô, nahoana no nanary anay mandrakizay Ianao, no sady manetroka amin’ny ondry fiandrinao ny fahatezeranao?

²Tsarovy ny fiangonanao izay efa azonao ho fananana fahiny, ilay navotanao ho firenena lovanao, dia ny tendrombohitra Ziona* izay nonenanao.

³Aingao ny tongotrao ka miakara ho amin’ny voarava mandrakizay! Ny zavatra rehetra tao amin’ny fitoerana masina dia simban’ny fahavalo avokoa.

⁴Nierona tao anatin’ny toeram-pivorian’ny fiangonanao ny mpandrafy Anao; nanangana ny fanevany ho famantarana izy.

⁵Ny fijery azy dia tahaka ny olona manainga famaky hijinja ny ala mikitroka;

⁶ary ankehitriny, ny rafitra voasokitra rehetra ao dia nasiany ny famaky sy ny kanonta.

⁷Nandoro ny fitoeranao masina tamin’ny afo izy; nolotoiny sy nazerany tamin’ny tany ny fonenan’ny anaranao.

⁸Hoy izy anakampo: Aoka hampahorintsika izy rehetra! Nandoro izay rehetra toerana fihaonana amin’Andriamanitra manerana ny tany izy.

⁹Tsy hitanay intsony ny famantaranay; tsy misy mpaminany intsony ary tsy misy aminay mahalala izay mbola haharetan’izao.

¹⁰Mandra-pahoviana, Andriamanitra ô, no hanaratsian’ny mpandrafy? Hanamavo ny anaranao mandrakizay va ny fahavalo?

¹¹Nahoana no mampihemotra ny tananao, dia ny tananao ankavanana, Ianao? Mampialà azy amin’ny tratranao ka mandringàna!

¹²Andriamanitra anefa no Mpanjakako hatrizay hatrizay; manao famonjena eny amin’ny tany Izy.

¹³Ianao no nampisaraka ny ranomasina tamin’ny herinao, Ianao no namakivaky ny lohan’ny dragona* tao anaty rano.

¹⁴Ianao no nanorotoro ny lohan’ny leviatana* ka nanome azy hohanin’izay firenena any an-tany efitra.

¹⁵Ianao no namaky ny vatolampy hamoaka loharano sy ony; Ianao no nahatankina ny ony tsy mety ritra.

¹⁶Anao ny andro, anao koa ny alina; Ianao no nampitoetra ny volana sy ny masoandro.

¹⁷Ianao no nametraka ny sisiny rehetra amin’ny tany; ny fahavaratra sy ny ririnina dia Ianao no namolavola azy.

¹⁸Tsarovy izao: Manaratsy NY TOMPO ny fahavalo ary manamavo ny anaranao ny olona adala.

¹⁹Aza manolotra ny ain’ny voromailalanao ho an’ny bibidia ary aza manadino mandrakizay ny ain’ny olo-mahantranao.

²⁰Hevero ny fanekena! Fa feno fonenan’ny fanaovana an-keriny ny toerana maizina amin’ny tany.

²¹Aoka tsy hiverina amin-kenatra ny mahantra! Aoka ny ory sy ny malahelo hidera ny anaranao!

²²Mitsangàna, Andriamanitra ô, efao ny adinao! Tsarovy ny fanaratsian’ny adala Anao mandritra ny andro!

²³Aza manadino ny feon’ny rafinao, dia ny tabataba izay miakatra mandrakariva avy amin’ireo mpanohitra Anao!