Read La Bible en Malgache Salamo 75 Bible Online

Salamo 75 - La Bible en Malgache bible

Salamo 75

¹Ho an’ny mpiventy hira. Al-tashet. Salamo nataon’i Asafa. Tononkira. Isaoranay Ianao, Andriamanitra ô; eny, isaoranay Ianao; fa akaiky ny anaranao; mitory ny fahagagana ataonao ny olona.

²Amin’ny fotoana voatendriko dia Izaho no hitsara marina.

³Mihorohoro ny tany sy ny mponina rehetra eo aminy, nefa Izaho no nampiorina ny andriny. Fiatoana.

⁴Hoy aho tamin’ny mpirehareha: Aza mirehareha! Ary tamin’ny ratsy fanahy: Aza manandra-tandroka*!

⁵Aza manandratra ny tandrokareo ho avo ary aza mikiribiby amin’ny fiteny an’avona.

⁶Fa tsy avy any atsinanana na avy any andrefana na avy any atsimo na avy any amin’ny tendrombohitry ny tany efitra no hiavian’ny fisandratana.

⁷Fa Andriamanitra no Mpitsara; mampietry ny iray Izy ary manandratra ny iray hafa kosa.

⁸Fa misy kapoaka eo an-tanan’NY TOMPO, feno divay mandroatra, miharoharo zavatra iny ka ampisotroany; eny, ny ratsy fanahy rehetra amin’ny tany dia hitroka ny faikany.

⁹Fa hanambara izany mandrakariva aho ka hankalaza an’Andriamanitr’i Jakoba.

¹⁰Ny tandroky ny ratsy fanahy rehetra dia hotapahiko; ny tandroky ny marina dia hasandratra.