Read La Bible en Malgache Salamo 78 Bible Online

Salamo 78 - La Bible en Malgache bible

Salamo 78

¹Maskila nataon’i Asafa. Henoy ny fampianarako, ry oloko! Atongilano ny sofinareo amin’ny tenin’ny vavako.

²Hiloa-bava hilaza fanoharana aho! Hanonona ankamantatra efa hatry ny ela aho.

³Izay efa rentsika sy fantatsika ary nambaran’ny razantsika tamintsika

⁴dia tsy mba hafenintsika amin’ny zanany, fa hambarantsika amin’ny taranaka ho avy ny fiderana NY TOMPO sy ny heriny ary ny fahagagana nataony.

⁵Fa nanorina teny vavolombelona teo amin’i Jakoba Izy ary teo amin’ny Israely no nametrahany lalàna izay nandidiany ny razantsika, hampahafantariny ny zanany,

⁶mba hahafantatra izany ny taranaka ho avy, dia ny zaza mbola hateraka, ka hitsangana hitory izany amin’ny zanany kosa.

⁷Hametraka ny fanantenany amin’Andriamanitra izy ka tsy hanadino ny asany fa hitandrina ny didiny;

⁸tsy ho tahaka ny razany izay taranaka maditra sy mpiodina, izy, dia taranaka izay tsy nampiorina ny fony sady tsy marina tamin’Andriamanitra ny fanahiny.

⁹Ny zanak’i Efraima izay nitondra tsipìka hitifirany dia niamboho tamin’ny andron’ny ady.

¹⁰Tsy nitandrina ny faneken’Andriamanitra izy ary tsy nety nandeha araka ny lalànany.

¹¹Nohadinoiny ny asany sy ny fahagagana izay nampahitany azy.

¹²Teo anatrehan’ny razany no nanaovany fahagagana tany amin’ny tany Ejipta, dia tany amin’ny tany lemak’i Zoana.

¹³Nampisaraka ny ranomasina Izy ka nitondra azy nita, dia nampijoro ny rano ho toy ny antontan-javatra.

¹⁴Tamin’ny rahona no nitarihany azy raha antoandro ary afo mahazava nony alina.

¹⁵Namaky vatolampy tany an-tany efitra Izy ka nampigoka azy tahaka ny tamin’ny ranon’ny lalina.

¹⁶Nampivoaka rano mandriaka avy tamin’ny harambato Izy ka nampirotsaka rano ho tahaka ny ony.

¹⁷Kanjo mbola nandroso nanota Taminy ihany izy ireo ka nampahatezitra ny Avo Indrindra tany an-tany efitra.

¹⁸Naka fanahy an’Andriamanitra tao am-pony izy tamin’ny nilany hanina araka izay nahaliana azy.

¹⁹Dia niteny nanohitra an’Andriamanitra izy hoe: Mahay mamelatra latabatra atỳ an-tany efitra va Andriamanitra?

²⁰Indro, nikapoka ny vatolampy Izy dia nigororoana ny rano ka nandriaka; mahay manome mofo koa va Izy? Mahatonga hena ho an’ny olony va Izy?

²¹Nony ren’NY TOMPO izany dia tezitra Izy; nisy afo nirehitra tamin’i Jakoba sady nisy fahatezerana namely an’Israely,

²²satria tsy nino an’Andriamanitra izy ireo ka tsy natoky ny famonjeny.

²³Kanefa nandidy ny rahona tany ambony Izy ary ny varavaran’ny lanitra no novohany,

²⁴dia nampirotsaka mana taminy mba hohaniny Izy ary varin’ny lanitra no nomeny azy.

²⁵Ny fihinan’ny mahery no nohanin’ny olona; nandefasany hanina hahavoky azy izy.

²⁶Nampandeha ny rivotra avy any atsinanana teny amin’ny lanitra Izy ary ny heriny no nitondrany ny rivotra avy any atsimo;

²⁷dia nampilatsahany hena betsaka ohatra ny vovoka izy sy voromanidina ohatra ny fasiky ny ranomasina

²⁸ka nalatsany teny afovoan’ny tobiny manodidina ny fitoerany.

²⁹Dia nihinana izy ireo ka voky tsara ary izay nilainy dia nomeny azy.

³⁰Nefa tsy niala tamin’ny filany izy ary mbola teo am-bavany ihany ny haniny

³¹raha nirehitra taminy ny fahatezeran’Andriamanitra ka nahafatesany ny tremalahy teo aminy ary naripany ny zatovolahin’ny Israely.

³²Tamin’izany rehetra izany anefa dia mbola nanota ihany izy ireo ka tsy nino ny fahagagana nataony.

³³Dia nanapitra ny androny tao anatin’ny zava-poana Izy ary ny taonany tao amin’ny horohoro.

³⁴Rehefa nisy novonoiny tamin’ireo dia nitady Azy izy dia niverina, dia nikatsaka Azy fatratra.

³⁵Dia nahatsiaro izy fa Andriamanitra no vatolampiny ary Andriamanitra Avo Indrindra no Mpanavotra azy.

³⁶Kanefa namitaka Azy tamin’ny vavany ireo ary tamin’ny lelany no nandaingany Taminy.

³⁷Ny fony dia tsy niorina Taminy akory; eny, tsy nitana ny fanekeny izy.

³⁸Nefa Andriamanitra dia be famindrampo ka mamela heloka fa tsy mandringana; eny, nahatsindry fo tokoa Izy ka tsy nofohaziny avokoa ny fahavinirany.

³⁹Nahatsiaro Izy fa nofo ihany ireo, rivotra izay mandalo ka tsy miverina intsony.

⁴⁰Impiry akory izy ireo no efa nikomy Taminy tany an-tany efitra ka nampalahelo Azy tany an-tany foana!

⁴¹Naka fanahy an’Andriamanitra mandrakariva izy ka nampalahelo ny Iray Masin’ny Israely.

⁴²Tsy mba tsaroany ny namonjeny azy, na ny andro izay nanavotany azy tamin’ny fahavalo,

⁴³izay nanaovany famantarana tany Ejipta sy fahagagana tany an-tany lemak’i Zoana:

⁴⁴Nampody ny oniny ho ra Izy ary ny reniranony dia tsy azony nisotroana.

⁴⁵Nandefa fihitra betsaka hamely azy Izy ka nandany azy ireny ary sahona ka nanimba azy ireny.

⁴⁶Dia nanome ny vokatry ny taniny ho an’ny sompanga Izy ary ny vokatry ny asany ho an’ny valala.

⁴⁷Namono ny voalobony tamin’ny havandra Izy ary ny aviaviny tamin’ny havandra vaventy.

⁴⁸Dia nanolotra ny biby fiompiny ho an’ny havandra Izy ary ny omby aman’ondriny ho an’ny varatra.

⁴⁹Nandatsaka ny fahatezerany mirehitra taminy Izy; eny, fahavinirana sy fahatezerana ary fampahoriana, dia anjely maro mitondra loza.

⁵⁰Nanamboatra lalana ho an’ny fahatezerany Izy ary tsy niaro ny ain’ireo tamin’ny fahafatesana, fa nanolotra azy ho lanin’ny areti-mandringana.

⁵¹Namely ny lahimatoa rehetra tany Ejipta Izy, dia ny voalohan-terany tany an-dain’i Hama.

⁵²Namindra toerana ny olony toy ny ondry Izy ary nitarika azy tany an-tany efitra toy ny andian’ondry.

⁵³Notarihiny tamim-piadanana izy ireo ka tsy mba natahotra, fa ny fahavalony kosa dia voasaron’ny ranomasina.

⁵⁴Nitondra azy ho any amin’ny tany misy ny fitoerany masina Izy, dia ny tendrombohitra izay azon’ny tanany ankavanana.

⁵⁵Nandroaka ny Jentilisa* teo anoloany Izy ka nanome ny tanin’ireny ho lova nozaraina tamin’ny kofehy fandrefesana, dia nampitoetra ireo fokon’ny Israely tao an-dainy avy.

⁵⁶Nefa naka fanahy an’Andriamanitra Avo Indrindra izy ka nikomy taminy ary tsy notandremany ny teny vavolombelony.

⁵⁷Nihemotra izy ka nivadika tahaka ny razany dia nania tahaka ny tsipìka mamitaka ny mpampiasa azy.

⁵⁸Nampahatezitra Azy tamin’ny toerana fanaovany sorona izy sady nahasaro-piaro Azy tamin’ny sarin-javatra voasokitra.

⁵⁹Nandre izany Andriamanitra dia tezitra ka nolaviny mihitsy ny Israely

⁶⁰sady nahafoy ny tabernakeliny* tao Silo Izy, dia ny tranolay izay naoriny teo amin’ny olona;

⁶¹natolony ho babo ny heriny ary ho eo an-tanan’ny fahavalo ny voninahiny.

⁶²Dia nanolotra ny olony ho an’ny sabatra Izy ary tezitra indrindra tamin’ny lovany.

⁶³Ny zatovolahiny dia lanin’ny afo ary ny zatovovaviny dia tsy mba nisy nidera.

⁶⁴Lavon-tsabatra ny mpisorony, nefa tsy nisaona ny mpitondratenan’ireo.

⁶⁵Dia nifoha tahaka ny olona avy natory ny Tompo, tahaka ny lehilahy mahery izay miantsoantso azon’ny divay.

⁶⁶Namely ny fahavalony avy ao aorianany Izy ka nahafa-baraka azy mandrakizay.

⁶⁷Nanary ny tranolain’i Josefa Izy ary tsy nofidiny ny fokon’i Efraima.

⁶⁸Fa nifidy ny fokon’i Joda* kosa Izy, dia ny tendrombohitra Ziona* izay tiany.

⁶⁹Nanao ny fitoerany masina ho tahaka ny havoana Izy, tahaka ny tany izay naoriny ho mandrakizay.

⁷⁰Nifidy an’i Davida mpanompony Izy ka naka azy avy tany amin’ny valan’ondry;

⁷¹tany amin’ny fiandrasany ny ondrivavy mampinono no nakany azy mba hiandry an’i Jakoba olony sy Israely lovany.

⁷²Dia niandry ireo tamin’ny hitsim-po izy ka nitondra azy araka ny fahendren’ny tanany.