Read La Bible en Malgache Salamo 8 Bible Online

Salamo 8 - La Bible en Malgache bible

Salamo 8

¹Ho an’ny mpiventy hira. Al-hagitit. Salamo nataon’i Davida. RY TOMPO Andriamanitray ô, endre ny voninahitry ny anaranao amin’ny tany rehetra! Nataonao eny amin’ny lanitra ny famirapiratan’ny voninahitrao.

²Avy amin’ny vavan’ny ankizy madinika sy ny zaza minono no nanorenanao manda mafy eo anatrehan’ny mpandrafy Anao mba hampanginanao ny fahavalo sy izay ta hamaly ratsy.

³Raha jereko ny lanitra izay asan’ny rantsantananao sy ny volana aman-kintana izay nampitoerinao

⁴inona moa ny olona no ahatsiarovanao azy? Ary inona ny zanak’olombelona no amangianao azy?

⁵Fa nataonao ambany kely noho Andriamanitra izy ary nosatrohanao voninahitra sy famirapiratana.

⁶Nampanjakainao amin’ny asan’ny tananao izy, nataonao eo ambanin’ny tongony ny zavatra rehetra,

⁷dia ny ondry aman’osy sy ny omby rehetra ary ny bibidia koa,

⁸ny voromanidina sy ny hazandrano any an-dranomasina izay mandeha amin’ny lalan-dranomasina.

⁹RY TOMPO Andriamanitray ô, endre ny voninahitry ny anaranao amin’ny tany rehetra!