Read La Bible en Malgache Salamo 81 Bible Online

Salamo 81 - La Bible en Malgache bible

Salamo 81

¹Ho an’ny mpiventy hira. Al-gitit. Nataon’i Asafa. Mihobia ho an’Andriamanitra herintsika! Manaova feo fifaliana ho an’Andriamanitr’i Jakoba!

²Asandrato ny hira ka velezo ny ampongatapaka ary tendreo ny lokanga tsara faneno mbamin’ny valiha.

³Tsofy ny anjomara amin’ny voaloham-bolana, amin’ny fenovolana, dia amin’ny andro firavoravoantsika.

⁴Fa lalàna ho an’ny Israely izany ary fitsipika avy amin’Andriamanitr’i Jakoba.

⁵Notendreny ho vavolombelona eo amin’i Josefa izany raha nandeha namely ny tany Ejipta Izy. Nandre feo tsy fantatro aho niteny hoe:

⁶Nampiala ny entana tamin’ny sorony Aho, nitsahatra tsy nitondra sobika ny tanany.

⁷Fony azom-pahoriana ianao dia niantso Ahy ka nanafaka anao Aho; namaly anao tao amin’ny fiafenan’ny kotrokorana Aho ary nizaha toetra anao tao amin’ny ranon’i Meriba. Fiatoana.

⁸Mihainoa, ry oloko, fa hanambara aminao Aho! Enga anie ka hihaino Ahy ianao, ry Israely ô;

⁹Aza asiana andriamanitra hafa eo aminao! Aza miankohoka amin’ny andriamanitry ny firenena hafa!

¹⁰Izaho no TOMPO Andriamanitrao izay nitondra anao niakatra avy tany amin’ny tany Ejipta; atanatanao ny vavanao dia hofenoiko.

¹¹Nefa tsy nihaino ny feoko ny oloko ary tsy nankatò Ahy ny Israely

¹²ka navelako hanaraka ny ditran’ny fony izy, handehanany manaraka ny fisainan’ny tenany.

¹³Enga anie ka hihaino Ahy ny oloko ka handeha amin’ny lalako ny Israely!

¹⁴Vetivety dia hampietry ny fahavalony Aho ka hamerina ny tanako hamely ny rafiny!

¹⁵Izay mankahala NY TOMPO dia hikoy Aminy, fa haharitra mandrakizay ny andron’ny oloko.

¹⁶Hampihinana azy vary tsara indrindra Izy; eny, tantely avy amin’ny vatolampy no hamokisako anao.