Read La Bible en Malgache Salamo 83 Bible Online

Salamo 83 - La Bible en Malgache bible

Salamo 83

¹Tononkira. Salamo nataon’i Asafa. Andriamanitra ô, aza mangina Ianao! Aza mihombom-bava, aza mamitsaka, Andriamanitra ô!

²Fa indro, mitabataba ny fahavalonao ary izay mankahala Anao dia manandratra ny lohany.

³Ny olonao no iokoany amin’ny hafetsena ary miara-misaina hamely izay arovanao izy.

⁴Hoy izy: Avia ka andeha hofongorantsika tsy ho firenena izy mba tsy hotsarovana intsony ny anaran’ny Israely.

⁵Fa efa niray tetika tokoa ireo ka nanao fanekena hanohitra Anao,

⁶dia ny tranolain’ny Edomita sy ny Ismaelita, ny Moabita sy ny Hagarita,

⁷ny Gebalita sy ny Amonita ary ny Amalekita, ny Filistina mbamin’ny mponina any Tiro;

⁸ny Asiriana koa dia nikambana taminy; nanome sandry ny taranak’i Lota ireo. Fiatoana.

⁹Ataovy tahaka ny Midianita izy ary tahaka an’i Sisera sy i Jabina teo amin’ny ony Kisona;

¹⁰levona tany Eny-Dora ireo; tonga zeziky ny tany izy.

¹¹Ataovy tahaka an’i Oreba sy i Zeba ny olo-manankaja eo aminy; eny, ny andrianany rehetra dia ataovy tahaka an’i Zebaha sy i Zalmona

¹²izay niteny hoe: Aoka halaintsika ho antsika ny fonenan’Andriamanitra!

¹³Andriamanitro ô, ataovy tahaka ny tadio ireo, dia tahaka ny akofa entin’ny rivotra,

¹⁴tahaka ny afo mandoro ala sy tahaka ny lelafo mampirehitra tendrombohitra!

¹⁵Aoka ho toy izany no anenjehanao azy amin’ny tadionao sy ampihorohoroanao azy amin’ny tafio-drivotrao!

¹⁶Saròny henatra ny tavany mba hitadiavany ny anaranao, TOMPO ô!

¹⁷Aoka ho menatra sy ho azon-tahotra mandrakizay izy; eny, aoka hangaihay sy ho ringana izy.

¹⁸Aoka ho fantany fa Ianao irery ihany, izay atao hoe NY TOMPO, no Ilay Avo Indrindra ambonin’ny tany rehetra.