Read La Bible en Malgache Salamo 84 Bible Online

Salamo 84 - La Bible en Malgache bible

Salamo 84

¹Ho an’ny mpiventy hira. Al-hagitit. Salamo nataon’ny Koraìta. Endre ny hatsaran’ny tabernakelinao*, Andriamanitra, Tompon’izao rehetra izao ô!

²Manina sady vonton’alahelo ny kianjan’NY TOMPO ny fanahiko; mihoby an’Andriamanitra velona ny foko sy ny nofoko.

³Eny, mahita trano ny tsikirity ary mahita akany hametrahany ny zanany ny sidintsidina, dia ny alitaranao, Andriamanitra, Tompon’izao rehetra izao ô, Mpanjakako sy Andriamanitro!

⁴Sambatra izay mitoetra ao amin’ny tranonao! Hidera Anao mandrakariva izy. Fiatoana.

⁵Sambatra ny olona izay manana ny heriny ao Aminao; ao am-pony ny lalana voavoatra tsara.

⁶Raha mandeha mamakivaky ny lohasaha Baka[4] izy dia ataony misy loharano izany ary ny lohaorana no manarom-pitahiana azy.

⁷Mitombo hery eny am-pandehanana izy; samy miseho eo anatrehan’Andriamanitra any Ziona* izy rehetra.

⁸RY TOMPO, Andriamanitra Tompon’izao rehetra izao ô, henoy ny vavaka ataoko! Mandrenesa, ry Andriamanitr’i Jakoba ô! Fiatoana.

⁹Andriamanitra, ampinganay ô, tsinjovy! Jereo ny tavan’ny Voahosotrao.

¹⁰Fa ny indray andro eo an-kianjanao dia tsara noho ny arivo; aleoko mipetraka eo amin’ny tokonam-baravaran’ny tranon’Andriamanitra, toy izay hitoetra ao an-dain’ny ratsy fanahy.

¹¹Fa masoandro sy ampinga NY TOMPO Andriamanitra; fahasoavana sy voninahitra no homen’NY TOMPO, tsy miaro zava-tsoa amin’izay mandeha amin’ny fahitsiana Izy.

¹²Andriamanitra, Tompon’izao rehetra izao ô, sambatra izay olona matoky Anao!