Read La Bible en Malgache Salamo 86 Bible Online

Salamo 86 - La Bible en Malgache bible

Salamo 86

¹Vavaka nataon’i Davida. Mihainoa, TOMPO ô, ka valio aho fa ory sy mahantra!

²Arovy aho fa masina aho! Andriamanitro ô, vonjeo ny mpanomponao izay matoky Anao!

³Tompo ô, mamindrà fo amiko! Fa Aminao no itarainako mandrakariva.

⁴Ampifalio aho, dia izaho mpanomponao; fa Aminao, Tompo ô, no anandratako ny fanahiko.

⁵Ianao, Tompo ô, no tsara sady mamela heloka ary be famindrampo amin’izay rehetra miantso Anao.

⁶Henoy ny vavaka ataoko, TOMPO ô, henoy tsara ny feon’ny fifonako!

⁷Amin’ny andro mampahory ahy dia miantso Anao aho, fa mamaly ahy Ianao.

⁸Tsy misy tahaka Anao, Tompo ô, amin’ireo andriamanitra ary tsy misy tahaka ny asanao.

⁹Ny firenena rehetra nataonao dia ho avy hiankohoka eo anatrehanao, Tompo ô, ka hanome voninahitra ny anaranao.

¹⁰Fa lehibe Ianao ka manao zava-mahagaga; Ianao irery ihany no Andriamanitra.

¹¹Ampianaro ny lalanao aho, TOMPO ô, dia handeha amin’ny fahamarinanao. Aoka ny foko manontolo hatahotra ny anaranao.

¹²Hidera Anao amin’ny foko manontolo aho, Tompo Andriamanitro ô; hanome voninahitra ny anaranao mandrakizay aho.

¹³Fa lehibe ny famindramponao amiko ary efa nafahanao tamin’ny fitoeran’ny maty* any ambany indrindra aho.

¹⁴Andriamanitra ô, mitsangana hanohitra ahy ny mpirehareha ary mitady ny aiko ny antokon’ny mpampihorohoro, tsy mba heveriny fa eo anatrehany Ianao.

¹⁵Nefa Ianao, Tompo ô, dia Andriamanitra mamindra fo sy miantra, mahari-po sady be famindrampo sy fahamarinana.

¹⁶Todiho aho ka amindrao fo, omeo ny herinao ny mpanomponao ary vonjeo ny zanaky ny mpanompovavinao!

¹⁷Anehoy famantarana ny ho soa aho mba ho hitan’izay mankahala ahy ka ho menatra izy! Fa Ianao TOMPO ô, no mamonjy sy mampionona ahy.