Read La Bible en Malgache Salamo 88 Bible Online

Salamo 88 - La Bible en Malgache bible

Salamo 88

¹Tononkira. Salamo nataon’ny Koraìta. Ho an’ny mpiventy hira. Al-mahalat-leanot. Maskila nataon’i Hemana ezrahita. TOMPO ô, Andriamanitry ny famonjena ahy! Andro aman’alina no itarainako eo anatrehanao.

²Aoka ny vavaka ataoko ho tonga eo anatrehanao! Henoy tsara ny fitarainako!

³Fa diboky ny fahoriana aho ary manakaiky ny fitoeran’ny maty* ny aiko.

⁴Natao ho isan’izay midina any an-davaka aho ary tahaka ny lehilahy tsy manan-kery intsony.

⁵Efa nafoy ho naman’ny maty aho, toy ny voatrabaka sy mandry any amin’ny fasana, izay tsy tsarovanao intsony fa voafongotra tsy ho eo an-tananao.

⁶Efa nametraka ahy any an-davaka ambany indrindra Ianao, ao amin’ny maizina, dia ao amin’ny lalina.

⁷Ny fahatezeranao dia manindry ahy mafy ary ny alondranonao rehetra dia azeranao amiko. Fiatoana.

⁸Nampanalavirinao ahy ny olona nahazatra ahy, nataonao fahavetavetana eo imasony aho; voahidy aho ka tsy afa-mivoaka.

⁹Efa pahina noho ny fahoriana ny masoko; TOMPO ô, miantso Anao isanandro aho, mamelatra ny tanako Aminao aho.

¹⁰Haneho fahagagana amin’ny maty va Ianao? Ny matoatoa va no hitsangana hidera Anao? Fiatoana.

¹¹Hotorina any am-pasana va ny famindramponao ary ny fahamarinanao any amin’ny fandringanana?

¹²Ho fantatra ao amin’ny maizina va ny fahagagana ataonao ary ny fahamarinanao any amin’ny tanin’ny fandringanana?

¹³Fa raha izaho dia Ianao no itarainako, TOMPO ô, ary ny vavaka ataoko dia tonga eo anatrehanao nony maraina.

¹⁴TOMPO ô, nahoana no manary ahy Ianao ka manafina ny tavanao amiko?

¹⁵Ory aho ka efa toy ny efa ho faty hatramin’ny fahazazako; itambesaran’ny fampitahoranao aho ka very hevitra.

¹⁶Manafotra ahy ny fahatezeranao, matin’ny fampitahoranao aho.

¹⁷Mandifotra ahy mandrakariva tahaka ny rano ireny, miara-manodidina ahy izy.

¹⁸Nampanalavirinao ahy ny olona tia ahy sy ny sakaizako; ireo nahazatra ahy dia tsy misy afa-tsy fahamaizinana.