Read La Bible en Malgache Salamo 89 Bible Online

Salamo 89 - La Bible en Malgache bible

Salamo 89

¹Maskila nataon’i Etana ezrahita Ny famindrampon’NY TOMPO no hohiraiko mandrakariva; hatramin’ny taranaka fara aman-dimby no hampahafantaran’ny vavako ny fahamarinanao.

²Fa hoy aho: Hotovonana mandrakizay ny famindrampo; ny fahamarinanao no hampitoerinao any an-danitra.

³Efa nanao fanekena tamin’ny Voafidiko Aho; eny, efa nianiana tamin’i Davida mpanompoko Aho hoe:

⁴Hampitoetra ny taranakao ho mandrakizay Aho ka hanangana ny sezafiandriananao hatramin’ny taranaka fara aman-dimby. Fiatoana.

⁵Hidera ny fahagagana ataonao ny lanitra, TOMPO ô, ary eo amin’ny fivorian’ny masina koa ny fahamarinanao.

⁶Fa iza any an-danitra no mitovy amin’NY TOMPO? Ary iza amin’ny zanak’ireo andriamanitra no afa-mitaha amin’NY TOMPO?

⁷Andriamanitra mahatahotra indrindra eo amin’ny filankevitr’ireo masina ary hatahoran’izay rehetra manodidina Azy fatratra?

⁸RY TOMPO, Andriamanitra Tompon’izao rehetra izao ô, iza no mahery tahaka Anao, TOMPO ô? Manodidina Anao ny fahamarinanao.

⁹Ianao manapaka ny fisavoanan’ny ranomasina; raha manonja ny alondrano dia mampitsahatra azy Ianao.

¹⁰Ianao no nanorotoro an’i Rahaba ho tahaka izay voavono; ny sandrinao mahery no nampielezanao ny fahavalonao.

¹¹Anao ny lanitra, anao koa ny tany; izao tontolo izao sy izay rehetra eo aminy, Ianao no nanorina azy.

¹²Ny avaratra sy ny atsimo, Ianao no nahary azy; ny anaranao no ihobian’i Tabara sy i Hermona.

¹³Manan-tsandry mahery Ianao; mahery ny tananao, misandratra ny tananao ankavanana.

¹⁴Rariny sy fitsarana marina no fanorenan’ny sezafiandriananao; famindrampo sy fahamarinana no mialoha ny tavanao.

¹⁵Sambatra izay firenena mahalala ny feo fihobiana! TOMPO ô, amin’ny fahazavan’ny tavanao no andehanany.

¹⁶Ny anaranao no ifaliany mandrakariva ary ny fahamarinanao no isandratany.

¹⁷Fa voninahitry ny heriny Ianao ary amin’ny fankasitrahanao no isandratan’ny tandrokay.

¹⁸Fa an’NY TOMPO ny ampinganay; an’ny Iray Masin’ny Israely ny mpanjakanay.

¹⁹Tamin’izany ny olonao masina dia nilazanao tamin’ny fahitana hoe: Nametraka famonjena tamin’ny mpiady mahery iray Aho ary nanandratra zatovo iray teo amin’ny olona.

²⁰Nahita an’i Davida mpanompoko Aho; ny diloiloko masina no nanosorako azy.

²¹Izy no homban’ny tanako; eny, ny sandriko no hampahery azy.

²²Tsy hamitaka azy ny fahavalo ary tsy hampahory azy ny ratsy fanahy.

²³Fa handripaka ny fahavalony eo anoloany Aho sady hamely izay mankahala azy.

²⁴Ny fahamarinako sy ny famindrampoko no homba azy ary amin’ny anarako no hisandratan’ny tandrony*.

²⁵Dia hampitoetra ny tanany amin’ny ranomasina Aho ary ny tanany havanana amin’ny ony.

²⁶Izy hiantso Ahy hoe: Raiko Ianao, Andriamanitro sy vatolampin’ny famonjena ahy.

²⁷Izaho kosa hanao azy ho lahimatoa ambony indrindra amin’ny mpanjakan’ny tany.

²⁸Hitahiry ny famindrampoko ho azy mandrakizay Aho ary ny fanekeko dia hampaharetiko aminy.

²⁹Hampaharitra ny taranany ho mandrakizay Aho ary ny sezafiandrianany dia ho tahaka ny faharetan’ny lanitra.

³⁰Raha mahafoy ny lalànako ny zanany ka tsy mandeha araka ny fitsipiko,

³¹raha ny fitsipiko no hamavoiny ary ny didiko no tsy tandremany,

³²dia hovalìko tsorakazo ny fahadisoany, ary hovalìko kapoka ny helony.

³³Kanefa ny famindrampoko tsy hofoanako aminy ary tsy havadiko ny fahamarinako;

³⁴tsy hivadihako ny fanekeko ary tsy hovako ny nolazain’ny molotro.

³⁵Izao zavatra iray loha izao no nianianako tamin’ny fahamasinako, tsy handainga amin’i Davida mihitsy Aho:

³⁶Ny taranany dia haharitra mandrakizay ary ny sezafiandrianany dia ho tahaka ny masoandro eo anatrehako.

³⁷Hampitoerina mandrakizay tahaka ny volana izy, tahaka ny vavolombelona marina any an-danitra. Fiatoana.

³⁸Kanefa narianao sy nolavinao izy! Tezitra tamin’ny Voahosotrao* Ianao!

³⁹Nofoananao ny fanekena tamin’ny mpanomponao; nolotoinao ny satroboninahiny ka narianao tamin’ny tany.

⁴⁰Noravanao ny fefiny rehetra; nosimbanao ny fiarovany mafy.

⁴¹Izay rehetra mandalo eny an-dalana dia mandroba azy; tonga fandatsan’ny mpiaramonina aminy izy.

⁴²Nampisandratra ny tanana havanan’ny rafilahiny Ianao ary nampifaly ny fahavalony rehetra.

⁴³Nampihemotra ny lelan’ny sabany Ianao ka tsy nampaharitra azy tamin’ny ady.

⁴⁴Nampitsahatra ny voninahiny Ianao ka nanongana ny sezafiandrianany ho amin’ny tany.

⁴⁵Nanafohy ny andron’ny fahatanorany Ianao ary nanaron-kenatra azy. Fiatoana.

⁴⁶Mandra-pahoviana, TOMPO ô? Hiery mandrakizay va Ianao? Hirehitra tahaka ny afo va ny fahatezeranao?

⁴⁷Tsarovy ny hafohin’ny androko; toa zava-poana mihitsy ny namoronanao ny zanak’olombelona rehetra!

⁴⁸Iza no lehilahy ho velona ka tsy hahita fahafatesana fa hahavonjy ny tenany tsy ho azon’ny fitoeran’ny maty*? Fiatoana.

⁴⁹Tompo ô, aiza ny famindramponao fahiny izay nianiananao tamin’i Davida tamin’ny fahamarinanao?

⁵⁰Tompo ô, tsarovy ny latsa manjo ny mpanomponao; ny tratrako dia mivesatra ny firenena marobe,

⁵¹dia ny nandatsan’ny fahavalonao, TOMPO ô, Eny, ny nandatsany ny dian’ny Voahosotrao!

⁵²Isaorana mandrakizay anie NY TOMPO! Amena! Eny, Amena!