Read La Bible en Malgache Salamo 90 Bible Online

Salamo 90 - La Bible en Malgache bible

Salamo 90

¹Vavaka nataon’i Mosesy, lehilahin’Andriamanitra. Tompo ô, efa fonenanay hatramin’ny taranaka rehetra Ianao.

²Fony tsy mbola ary ny tendrombohitra, na voaforonao ny tany sy izao rehetra izao, dia Andriamanitra Ianao, hatramin’ny taloha indrindra ka ho mandrakizay.

³Mamerina ny olona ho amin’ny vovoka Ianao ka miteny hoe: Miverena, ry zanak’olombelona!

⁴Fa eo imasonao ny arivo taona dia toy ny fandalon’ny omaly ary tahaka ny fotoam-piambenana iray amin’ny alina.

⁵Mipaoka azy tahaka ny riaka Ianao; torimaso izy; amin’ny maraina dia tahaka ny ahitra mora miova izy;

⁶amin’ny maraina dia mamony izy nefa mora miova; amin’ny hariva dia voajinja izy ka maina.

⁷Lanin’ny fahatezeranao izahay ary raiki-tahotra noho ny fahaviniranao.

⁸Ny helokay dia nataonao teo anatrehanao ary ny fahotanay miafina dia nataonao teo amin’ny fahazavan’ny tavanao.

⁹Fa ny andronay rehetra dia mandalo noho ny fahatezeranao; laninay toy ny eritreritra ny taonanay.

¹⁰Fitopolo taona ny halavan’ny andronay ary raha toa ka mateza aza dia valopolo taona, nefa fahasasarana sy zava-poana ny voninahiny fa mihelina haingana izany ka lasa manidina izahay.

¹¹Iza no mahafantatra ny herin’ny fahatezeranao sy ny fahaviniranao araka izay tokony ho fahatahorana Anao?

¹²Mampianara anay hanisa ny andronay, hahazoanay fo hendry.

¹³Miverena, TOMPO ô! Mandra-pahoviana? Mba aneneno ny aminay mpanomponao!

¹⁴Vokiso ny famindramponao nony maraina izahay mba hihobianay sy hifalianay amin’ny andro rehetra hiainanay.

¹⁵Mampifalia anay araka ny andro nampahorianao anay sy ny taona nahitanay loza.

¹⁶Aoka hiseho aminay mpanomponao ny asanao ary ny voninahitrao amin’ny zanakay.

¹⁷Aoka ho aminay ny fahasoavan’ny Tompo Andriamanitray! Ampitoero aminay ny asan’ny tananay; Eny, ny asan’ny tananay, ampitoero izy!