Read La Bible en Malgache Salamo 95 Bible Online

Salamo 95 - La Bible en Malgache bible

Salamo 95

¹Avia, aoka isika hihoby ho an’NY TOMPO! Aoka isika hanao feo fifaliana ho an’ny Vatolampy famonjena antsika!

²Aoka hankeo anatrehany amin’ny fiderana isika, aoka hanao feo fifaliana ho Azy amin’ny salamo isika.

³Fa Andriamanitra lehibe NY TOMPO; Mpanjaka lehibe ambonin’ny andriamanitra rehetra Izy.

⁴Eo an-tanany ny fitoerana lalina amin’ny tany. Azy ny tendrombohitra avo.

⁵Azy ny ranomasina fa Izy no nanao azy ary ny tany maina dia novolavolain’ny tanany.

⁶Avia, aoka isika hiondrika sy hiankohoka, aoka isika handohalika eo anatrehan’NY TOMPO, Mpanao antsika;

⁷Fa Izy no Andriamanitsika ary olona fiandriny sy ondry tandremany isika. Enga anie ka hohenoinareo anio ny feony hoe:

⁸Aza manamafy ny fonareo tahaka ny tao Meriba sy tahaka ny tamin’ny andro tao Masa, fony tany an-tany efitra,

⁹izay nakan’ny razanareo fanahy Ahy sy nizahany toetra Ahy, na dia efa hitany aza ny asako.

¹⁰Efapolo taona no nahamonamonaina Ahy tamin’izany taranaka izany ka hoy Aho: Olona maniasia amin’ny fony izy ka tsy mahalala ny lalako.

¹¹Koa nianiana tamin’ny fahatezerako Aho hoe: Tsy hiditra amin’ny fitsaharako mihitsy izy!