Read La Bible en Malgache Ohabolana 1 Bible Online

Ohabolana 1 - La Bible en Malgache bible

Ohabolana 1

¹Ohabolan’i Solomona, zanak’i Davida, mpanjakan’ny Israely,

²hahalalana fahendrena sy fananarana, hahatakarana izay lazain’ny fahalalana,

³handraisana fananarana mampahahendry, dia fahamarinana sy rariny ary fahitsiana;

⁴hanomezana hakingana ho an’ny tso-po, ary fahalalana sy fahaiza-mandinika ho an’ny zatovo.

⁵Aoka hihaino ny hendry ka hitombo fahalalana; ary aoka ny mahira-tsaina hahazo fahaiza-mitondra,

⁶hahazoany ny hevitry ny ohabolana sy ny teny saro-takarina mbamin’ny tenin’ny hendry sy ny teny saro-pantarina ataony.

⁷Ny fahatahorana NY TOMPO no fiandohan’ny fahalalana; fa ny adala dia manamavo ny fahendrena sy ny anatra.

⁸Anaka, mihainoa ny fananaran’ny rainao, ary aza mahafoy ny fampianaran’ny reninao;

⁹fa fehiloha tsara tarehy amin’ny lohanao izany ary firavaka iambozonanao.

¹⁰Anaka, raha taomin’ny mpanota ianao dia aza manaiky.

¹¹Raha hoy izy ireo hoe: Andeha hiaraka aminay, andeha isika hanao vela-pandrika handatsa-dra, andeha hofandrihantsika tsy amin’antony ny tsy manan-tsiny,

¹²andeha isika hitelina azy velona tahaka ny fitelin’ny fitoeran’ny maty* ary hanao azy teli-moka toy ny latsaka an-davaka,

¹³dia ho antsika ny fananana sarobidy isan-karazany rehetra ka hofenointsika babo ny tranontsika.

¹⁴Avia hiara-miloka aminay ianao ka ho iray ihany ny kitapom-bolantsika rehetra!

¹⁵Anaka, aza miara-dalana aminy ianao, arovy tsy hankany amin’ny alehany ny tongotrao;

¹⁶eny, ny tongony mihazakazaka ho amin’ny ratsy ary mailaka erỳ izy handatsa-dra.

¹⁷Foana ny amelarana ny fandrika raha hitan’ny manana elatra rehetra.

¹⁸Ireny mantsy dia manao vela-pandrika handatsa-dra ny tenany ihany, mamitsaka izy, nefa ny tenany ihany no ho faty.

¹⁹Toy izany no hiafaran’izay rehetra fatra-pitady harena tsy marina; fa hipaoka ny ain’izay fatra-pitady azy izany.

²⁰Miantso mafy eny an-dalambe ny Fahendrena, manandratra ny feony eny amin’ny kianja malalaka izy;

²¹miantsoantso eny an-tampon’ny toerana feno tabataba izy; eny am-bavahadin’ny tanàna no anambaràny ny teniny hoe:

²²Ry kely saina, mandra-pahoviana no hitiavanareo ny hadalana sy hifalian’ny mpaniratsira amin’ny faniratsirana ary hankahalan’ny adala ny fahalalana?

²³Miverena ianareo hihaino ny fananarako! Indro, haidiko aminareo ny fanahiko ary hampahafantariko anareo ny teniko.

²⁴Satria efa niantso aho, nefa nandà ianareo; efa nanatsotra ny tanako aho, nefa tsy nisy niraharaha.

²⁵Nohamavoinareo ny torohevitra rehetra natolotro sady tsy nety nanaiky ny anatro ianareo;

²⁶Izaho kosa dia hihomehy, rehefa manjo anareo ny loza; handatsa aho, rehefa tonga izay mahatahotra anareo,

²⁷rehefa tonga tahaka ny rivo-doza ny zava-mahatahotra anareo, ary ny loza ho avy toy ny tadio ka manjo anareo ny fahoriana sy ny tebiteby.

²⁸Amin’izay dia hiantso ahy izy, nefa tsy hamaly aho; hitady ahy fatratra izy, nefa tsy ho hitany aho.

²⁹Satria nankahala ny fahalalana izy ary tsy nifidy ny fahatahorana NY TOMPO;

³⁰satria tsy nila ny saina natolotro izy fa notsiratsirainy avokoa ny anatro rehetra,

³¹dia hihinana ny vokatry ny alehany izy ka ho voky ny torohevitra avy amin’ny tenany.

³²Fa hahafaty ny kely saina ny fihemorany, ary ny tokitoky foanan’ny adala no handringana azy.

³³Fa izay mihaino ahy kosa dia hitoetra tsy manana ahiahy; eny, handry fehizay izy ka tsy hatahotra ny loza.