Read La Bible en Malgache Ohabolana 10 Bible Online

Ohabolana 10 - La Bible en Malgache bible

Ohabolana 10

¹Anatra samihafa nataon’i Solomona. Ny zanaka hendry dia mahafaly ny rainy, fa ny zanaka adala mampalahelo ny reniny.

²Ny harena azo tamin’ny tsy marina dia tsy mahasoa akory, fa ny fahamarinana no mamonjy amin’ny fahafatesana.

³Tsy avelan’NY TOMPO ho mosarena ny marina, fa foanany ny fitsiriritan’ny ratsy fanahy.

⁴Ho tonga mahantra ny miraviravy tanana amin’ny asany, fa mampanankarena ny tanan’ny mazoto.

⁵Izay manangona amin’ny fararano no olona hendry; fa izay sondrian-tory amin’ny taom-pijinjana no olona mampahamenatra.

⁶Fitahiana no ho eo amin’ny lohan’ny marina, fa loza no afenin’ny tenin’ny ratsy fanahy.

⁷Ny fahatsiarovana ny marina dia fitahiana, fa ho lo ny anaran’ny ratsy fanahy.

⁸Izay hendry am-po no mandray ny didy, fa ho lavo ny adala tsy mahay mangina.

⁹Izay mandeha tsy misy tsiny no mandeha tsy manana ahiahy, fa izay maniasia amin’ny alehany dia fantatra ihany.

¹⁰Izay mipy maso dia manome alahelo ary ny molotry ny adala dia mandavo ny tenany.

¹¹Loharanon’aina ny tenin’ny marina, fa loza no afenin’ny tenin’ny ratsy fanahy.

¹²Ny fankahalana dia manetsika adilahy, fa ny fitiavana no manarona ny ota rehetra.

¹³Amin’ny molotry ny manan-tsaina no ahitana fahendrena, fa hazo fikapohana kosa no ho amin’ny lamosin’ny tsy ampy saina.

¹⁴Ny hendry mirakitra fahalalana, fa ny tenin’ny adala dia fandringanana mitatao.

¹⁵Ny harenan’ny manankarena dia vohitra mafy ho azy, fa ny tsy fananan’ny ory no fandringanana azy.

¹⁶Ho fiainana ny asan’ny marina, fa ho ota ny fitomboan’ny harenan’ny ratsy fanahy.

¹⁷Izay mino anatra dia ho tonga eo amin’ny lalan’ny fiainana, fa mivily lalana izay manadino anatra.

¹⁸Izay mitahiry lolompo dia manana molotra mandainga ary izay mampiely endrikendrika dia adala.

¹⁹Ny teny maro dia tsy ilaozan’izay ota, fa izay mahatana ny molony no hendry.

²⁰Volafotsy voafantina ny lelan’ny marina, fa ny fon’ny ratsy fanahy dia tsy misy vidiny.

²¹Ny molotry ny marina dia mamelona ny maro, fa maty ny adala noho ny tsy fananany fahalalana.

²²Ny fitahian’NY TOMPO no mampanankarena ary tsy ampiany fisasarana izany.

²³Toa kilalaon’ny adala ny fanaovan-dratsy, fa ny an’ny manan-tsaina kosa dia ny fahendrena.

²⁴Izay atahoran’ny ratsy fanahy dia hihatra aminy, fa izay irin’ny marina kosa no homena azy.

²⁵Rehefa mipaoka ny tafio-drivotra dia tsy ao intsony ny ratsy fanahy, fa ny marina dia ho tafaorina mandrakizay.

²⁶Toy ny vinaingitra amin’ny nify sy ny setroka amin’ny maso, dia toy izany ny malaina amin’izay maniraka azy.

²⁷Ny fahatahorana NY TOMPO no mahela velona, fa ny taonan’ny ratsy fanahy dia hohafohezina.

²⁸Ny fanantenan’ny marina dia fifaliana, fa levona kosa ny fanantenan’ny ratsy fanahy.

²⁹Ny lalan’NY TOMPO dia fiarovana mafy ho an’izay tsy misy tsiny, fa faharinganana kosa ho an’ny mpanao ratsy.

³⁰Tsy hangozohozo mandrakizay ny marina, fa ny ratsy fanahy dia tsy honina amin’ny tany.

³¹Mamokatra fahendrena ny tenin’ny marina, fa hofongorana ny lela fandainga.

³²Ny molotry ny marina dia mahalala izay ankasitrahana, fa ny tenin’ny ratsy fanahy dia feno fitaka.