Read La Bible en Malgache Ohabolana 11 Bible Online

Ohabolana 11 - La Bible en Malgache bible

Ohabolana 11

¹Ny mizana mandainga dia fahavetavetana eo imason’NY TOMPO, fa ny vato marina no ankasitrahany.

²Rehefa tonga ny fiavonavonana dia tonga koa ny fahafaham-baraka, fa ao amin’ny manetry tena no misy ny fahendrena.

³Ny fahitsian’ny mahitsy no mitari-dalana azy, fa ny faharatsian’ny mpivadika no mahatonga faharinganana amin’ny tenany.

⁴Ny harena dia tsy mahasoa amin’ny andron’ny fahatezerana, fa ny fahamarinana no mamonjy tsy ho azon’ny fahafatesana.

⁵Mandamina ny alehany ny fahamarinan’ny marina, fa ny ratsy fanahy dia lavon’ny faharatsiany ihany.

⁶Manafaka ny mahitsy ny fahamarinany, fa ny mpivadika dia voafandriky ny filany.

⁷Raha maty ny ratsy fanahy dia levona ny fanantenany, eny, foana izay nantenainy tamin’ny heriny.

⁸Ny marina dia vonjena ho afaka amin’ny fahoriana, fa ho avy kosa ny ratsy fanahy handimby toerana azy.

⁹Ny tenin’ny mpihatsaravelatsihy no animbany ny namany, fa ny fahalalana no hanafahana ny marina.

¹⁰Raha miadana ny marina dia ravoravo ny tanàna; raha ringana ny ratsy fanahy dia velona ny hoby.

¹¹Ny fitahiana avy amin’ny marina no mampisandratra ny tanàna, fa ny tenin’ny ratsy fanahy no maharava azy.

¹²Tsy ampy saina izay manamavo ny namany, fa izay hendry kosa mangina.

¹³Izay mandehandeha manaratsy dia manambara ny zavatra afenina, fa ny olona mahatoky tsy mba tia lazalaza.

¹⁴Raha tsy misy fahaiza-mitondra dia rava ny firenena, fa famonjena ny fahamaroan’ny mpanolotsaina.

¹⁵Hahita loza tokoa ny miantoka vahiny, fa mitoetra tsy manana ahiahy ny mankahala antoka.

¹⁶Mahazo dera ny vehivavy tsara tarehy ary mandroba harena ny mpampihorohoro.

¹⁷Ny olona mamindra fo dia mahazo soa ho an’ny tenany, fa ny lozabe dia todìn’ny halozany.

¹⁸Ny ratsy fanahy dia mahazo tambiny mamitaka, fa izay mamafy fahamarinana no mahazo karama marina.

¹⁹Ny tena fahamarinana dia mamantana any amin’ny fiainana, fa izay fatra-panaraka ny ratsy no iharan’ny fahafatesana.

²⁰Fahavetavetana eo imason’NY TOMPO ny fo miolakolaka, fa ankasitrahany kosa izay mandeha tsy misy tsiny.

²¹Azo antoka fa tsy maintsy handray ny saziny ny ratsy fanahy, fa ny taranaky ny marina no ho afa-doza.

²²Toy ny kavina volamena eo amin’ny oron-kisoa ny vehivavy tsara tarehy nefa tsy manam-pahendrena.

²³Ny soa ihany no irin’ny marina, fa ny fahatezerana no fanantenan’ny ratsy fanahy.

²⁴Misy malala-tanana nefa mitombo fananana ihany ary misy izay fatra-pitahiry loatra nefa tonga mahantra ihany.

²⁵Izay manisy soa olona dia ho feno fanambinana ary izay mampisotro dia mba hampisotroina kosa.

²⁶Izay tsy mamoaka ny variny dia ozonin’ny olona, fa saotra no ho amin’ny lohan’izay mivarotra.

²⁷Izay fatra-pikatsaka ny tsara no mitady ny mahafinaritra, fa izay mitady ny ratsy dia hahita ny ratsy.

²⁸Izay matoky ny hareny dia ho lavo, fa ny marina dia ho tahaka ny ravin-kazo maitso.

²⁹Izay manakorontana ny ankohonany dia handova rivotra ary ny adala dia ho tonga mpanompon’ny hendry.

³⁰Ny vokatry ny marina dia hazon’aina ary ny hendry mahataona olona.

³¹Indro, ny marina aza dia valina etỳ an-tany, koa mainka fa ny ratsy fanahy sy ny mpanota!