Read La Bible en Malgache Ohabolana 12 Bible Online

Ohabolana 12 - La Bible en Malgache bible

Ohabolana 12

¹Izay tia fananarana no tia fahalalana, fa izay mankahala anatra dia biby.

²Mahazo sitraka amin’NY TOMPO ny tsara fanahy, fa ny mpamoron-tsain-dratsy dia hohelohiny.

³Tsy mahatafatoetra ny olona ny haratsiam-panahy, fa tsy mba hihetsika ny fototry ny marina.

⁴Ny vehivavy vanona dia satroboninahitry ny lahy, fa ny vehivavy manao izay mahamenatra kosa dia tahaka ny fahalovana ao anatin’ny taolana.

⁵Avy amin’ny fisainan’ny marina ny rariny, fa fitaka no sainin’ny ratsy fanahy.

⁶Ny tenin’ny ratsy fanahy dia vela-pandrika handatsahan-dra, fa ny tenin’ny marina hamonjy azy.

⁷Adaraboka ny ratsy fanahy ka tsy misy intsony, fa haharitra ny tranon’ny marina.

⁸Araka ny fahendren’ny olona no hiderana azy, fa izay meloka am-po dia hatao tsinontsinona.

⁹Aleo olona tsy ambony toerana loatra, nefa manana mpanompo iray, toy izay mihambo ho be voninahitra, nefa tsy manan-kohanina akory.

¹⁰Ny marina dia mitsimbina ny ain’ny bibiny, fa fahasiahana kosa no famindrampon’ny ratsy fanahy.

¹¹Izay miasa ny taniny dia ho voky hanina, fa izay manenjika zava-poana dia tsy ampy saina.

¹²Maniry ny hazan’ny ratsy fanahy ny mpanota, fa ny marina kosa mamokatra.

¹³Amin’ny fahotan’ny molotra dia misy fandrika mampidi-doza, fa ho afa-miala amin’ny fahoriana ny marina.

¹⁴Ny vokatry ny tenin’ny olona no mahavoky soa azy ary hitsingerina aminy ny asan’ny tanany.

¹⁵Ny lalan’ny adala dia heveriny ho mahitsy, fa izay mino anatra no hendry.

¹⁶Ny fahasosoran’ny adala dia fantatra miaraka amin’izay, fa izay mahatsindry fo amin’ny fanalam-baraka no hendry.

¹⁷Izay olona maneho ny marina dia manambara ny rariny, fa ny vavolombelona mandainga kosa dia miteny fitaka.

¹⁸Misy mandefalefa teny tsy tsaroana ka tonga toy ny fanindron’ny sabatra, fa ny lelan’ny marina kosa dia manasitrana.

¹⁹Ny molotra marina dia tafaorina ho mandrakizay, fa ny lela mandainga dia indray mipy maso monja.

²⁰Fitaka no ao am-pon’izay mamorona sain-dratsy, fa hafaliana no amin’izay misaina fiadanana.

²¹Tsy misy ratsy manjo ny marina, fa heni-doza ny ratsy fanahy.

²²Fahavetavetana eo imason’NY TOMPO ny molotra mandainga, fa izay manao ny marina no ankasitrahany.

²³Tsy mba mampideradera fahalalana foana ny olon-kendry, fa ny fon’ny adala mamoaka hadalana.

²⁴Ny tanan’ny mazoto no hanapaka, fa izay miraviravy tanana dia hampanompoina.

²⁵Ny ahiahy ao am-pon’ny olona dia mampitanondrika azy, fa ny teny soa no mampifaly azy.

²⁶Ny marina dia mitari-dalana ny namany, fa ny alehan’ny ratsy fanahy kosa no mampivily lalana azy.

²⁷Tsy mahatono izay nohazainy ny kamo, fa fananana soa ho an’ny olona kosa ny zoto.

²⁸Amin’ny lalan’ny fahamarinana no misy fiainana ary mankany amin’ny tsy fahafatesana ny lalan-kalehany.