Read La Bible en Malgache Ohabolana 13 Bible Online

Ohabolana 13 - La Bible en Malgache bible

Ohabolana 13

¹Ny zanaka hendry dia mihaino ny fananaran’ny rainy, fa ny mpaniratsira tsy mety mihaino na dia anarina mafy aza.

²Ny vokatry ny tenin’ny olona no ihinanany zava-tsoa, fa ny hampidi-doza no mahafaly ny mpivadika.

³Izay mitandrina ny fiteniny no miaro ny ainy, fa izay tsy mahay mangina dia ho ringana.

⁴Maniry zavatra ny kamo, nefa tsy mba mahazo na inona na inona, fa ny mazoto kosa dia hanana ny feno.

⁵Ny lainga dia halan’ny marina, fa manao izay maharikoriko sy mahamenatra ny ratsy fanahy.

⁶Miaro izay mandeha tsy misy tsiny ny fahamarinana, fa ny faharatsiam-panahy no mamotraka ny mpanota.

⁷Misy mihambo ho manankarena nefa tsy manana na inona na inona; misy kosa mody mahantra nefa manana harena be.

⁸Ny harenan’ny olona dia avotry ny ainy, fa tsy mba mampiraika ny mahantra akory ny levilevy.

⁹Ny fahazavan’ny marina dia feno fifaliana, fa ny jiron’ny ratsy fanahy ho faty.

¹⁰Fifandirana ihany no vokatry ny fiavonavonana, fa ao amin’izay mino anatra no misy ny fahendrena.

¹¹Ny harena azoazo foana dia mihena lalandava, fa izay mahavatra mitsimpona no mampitombo azy.

¹²Ny fanantenana tsy azo vetivety dia mankarary fo, fa hazon’aina ny faniriana tanteraka.

¹³Izay manamavo ny teny dia ho voasingony, fa izay matahotra ny didy no hahazo valim-pitia.

¹⁴Ny fampianaran’ny hendry dia loharanon’aina ka mampivily hiala amin’ny fandriky ny fahafatesana.

¹⁵Ny fananan-tsaina mahay mandanjalanja dia ahazoam-pitia, fa ny lalan’ny mpivadika dia tsy mitondra mankaiza.

¹⁶Ny mahira-tsaina rehetra dia miasa amin’ny fahalalana, fa ny adala kosa mampiharihary ny hadalany.

¹⁷Idiran-doza ny iraka ratsy fanahy, fa ny iraka mahatoky dia mitondra fanasitranana.

¹⁸Fahantrana sy henatra no ho an’izay mandà fananarana, fa izay mandray anatra no homem-boninahitra.

¹⁹Mamin’ny fo ny faniriana tanteraka, fa fahavetavetana ho an’ny adala ny hiala amin’ny ratsy.

²⁰Izay miara-dia amin’ny hendry dia ho hendry, fa izay misakaiza amin’ny adala dia hihadala.

²¹Ny mpanota dia enjehin’ny loza, fa ny marina hovalìna soa.

²²Mamela lova soa ho an’ny zafiny ny tsara fanahy, fa ny harenan’ny mpanota kosa dia voatahiry ho an’ny marina.

²³Ny tanin’ny mahantra izay voaasa dia ahazoana hanina be, fa maro ireo ringana noho ny fanaovany izay tsy rariny.

²⁴Izay mitsitsy ny tsorakazony dia tsy tia ny zanany, fa izay tia zanaka dia tsy misalasala manitsy azy.

²⁵Mihinana ny marina ka voky tsara, fa noana ny kibon’ny ratsy fanahy.