Read La Bible en Malgache Ohabolana 14 Bible Online

Ohabolana 14 - La Bible en Malgache bible

Ohabolana 14

¹Ny fahendren’ny vehivavy dia manangana ny tranony, fa ny fahadalana kosa mandrava ny tranony amin’ny tanany.

²Mandeha amin’ny fahitsiana izay matahotra NY TOMPO, fa izay mivily lalana kosa dia maniratsira Azy.

³Eo am-bavan’ny adala dia misy tsirin’ny fiavonavonana, fa ny molotry ny hendry kosa miaro azy.

⁴Raha tsy misy omby dia foana ny fihinanam-bilona, fa be ny fitomboan-karena azo avy amin’ny herin’ny omby.

⁵Tsy mba mandainga ny vavolombelona mahatoky, fa mamoaka lainga kosa ny vavolombelona tsy mahatoky.

⁶Mba mitady fahendrena ny mpaniratsira fa tsy mahita, mora mahazo fahalalana kosa ny manan-tsaina.

⁷Manalavira ny olona adala, fa tsy ho hitanao aminy ny molotry ny fahalalana.

⁸Ny mitandrina ny alehany no fahendren’ny mahira-tsaina, fa fitaka ny hadalan’ny adala.

⁹Ihomehezan’ny adala ny heloka nataony, fa ao amin’ny olo-marina no misy ny fahatsaram-panahy.

¹⁰Ny fo ihany no mahalala ny fangidian’ny alahelony ary tsy heverin’ny olon-kafa ny hafaliany.

¹¹Ravana ny tranon’ny ratsy fanahy, fa ambinina ny tranolain’ny marina.

¹²Misy lalana ataon’ny olona ho mahitsy, kanjo ny iafarany dia lalana mivarina any amin’ny fahafatesana.

¹³Na dia mihomehy aza dia ory ihany ny fo ary ny iafaran’ny hafaliana dia alahelo.

¹⁴Izay mpandeha ka nihemotra dia afa-po amin’izay alehany, fa ny tsara fanahy kosa ho afa-po amin’izay azy ihany.

¹⁵Mino ny teny rehetra ny kely saina, fa ny mahira-tsaina dia mandinika ny diany.

¹⁶Matahotra ny hendry ka mivily tsy ho amin’ny ratsy, fa ny adala dia fatra-pirehareha ka matokitoky foana.

¹⁷Izay malaky tezitra dia manao hadalana ary ny olona mamoron-tsain-dratsy dia ankahalaina.

¹⁸Ny kely saina dia handova fahadalana, fa ny mahira-tsaina dia mahazo ny fahalalana ho satroboninahiny.

¹⁹Ny ratsy fanahy dia miondrika eo anatrehan’ny tsara fanahy ary ny meloka miondrika eo am-bavahadin’ny marina.

²⁰Na dia ny havan’ny mahantra aza dia mankahala azy, fa maro ny tia ny manankarena.

²¹Izay manao tsinontsinona ny namany dia manota, fa sambatra izay mamindra fo amin’ny ory!

²²Tsy mivily lalana va izay misaina hanao ratsy? Fa famindrampo sy fahamarinana no ho an’izay misaina hanao ny tsara.

²³Misy valiny avokoa ny fisasarana rehetra, fa ny molotra mibedibedy foana dia tsy miteraka afa-tsy ny tsy fahampian-kanina.

²⁴Satroboninahitry ny hendry ny hareny, fa ny hadalan’ny adala dia hadalana ihany.

²⁵Ny vavolombelona marina mamonjy ain’olona, fa izay milaza lainga dia tena mpamitaka.

²⁶Ny fahatahorana NY TOMPO dia fiarovana mahatoky ka hahazo fialofana ny zanany.

²⁷Ny fahatahorana NY TOMPO no loharanon’aina hanalavirana ny fandriky ny fahafatesana.

²⁸Ny habetsahan’ny vahoaka no voninahitry ny mpanjaka, fa ny fihenan’ny isan’ny mponina kosa no fahalevonan’ny mpitondra.

²⁹Fahendrena no ao amin’izay mahatsindry fo, fa ny malaky tezitra dia mampiharihary ny hadalany.

³⁰Ny fahaveloman’ny vatana dia ny fo nofo tony, fa ny fitezeram-poana dia maha lo ny taolana.

³¹Izay mampahory ny madinika dia manala baraka ny Mpanao azy, fa ny mamindra fo amin’ny mahantra kosa manome voninahitra Azy.

³²Roahina ny ratsy fanahy noho ny haratsiany; ny marina kosa dia matoky na dia eo anoloan’ny fahafatesany aza.

³³Mandry tsara ao am-pon’ny manan-tsaina ny fahendrena, fa ny ao am-pon’ny adala kosa dia miharihary.

³⁴Manandratra ny firenena ny fahamarinana, fa ny ota kosa dia henatra ho an’ny olona.

³⁵Ny fankasitrahan’ny mpanjaka dia amin’ny mpanompo hendry, fa ny fahatezerany kosa dia amin’izay manao ny mahamenatra.