Read La Bible en Malgache Ohabolana 15 Bible Online

Ohabolana 15 - La Bible en Malgache bible

Ohabolana 15

¹Ny valinteny mora dia mampihemotra ny fahatezerana mafy, fa ny teny maharary dia mampiakatra ny fahasosorana.

²Mahatonga ny fahalalana ho mahafinaritra ny lelan’ny hendry, fa miboiboika hadalana ny tenin’ny adala.

³Amin’ny toerana rehetra ny mason’NY TOMPO, manara-maso ny ratsy fanahy sy ny tsara fanahy.

⁴Ny teny mampitony dia hazon’aina, fa ny vava ratsy mandratra ny fanahy.

⁵Ny adala maniratsira ny anatry ny rainy, fa izay mitandrina ny fananarana no hita fa hendry.

⁶Misy harena be ao an-tranon’ny marina, fa ny fitomboan’ny harenan’ny ratsy fanahy dia misy loza.

⁷Ny molotry ny hendry dia mampiely fahendrena, fa tsy mba toy izany ny fon’ny adala.

⁸Ny fanatitry ny ratsy fanahy dia fahavetavetana eo imason’NY TOMPO, fa ny vavaka ataon’ny marina no sitrany.

⁹Fahavetavetana eo imason’NY TOMPO ny lalan’ny ratsy fanahy, fa izay mikatsaka ny fahamarinana no tiany.

¹⁰Famaizana mafy no hihatra amin’izay miala amin’ny lalana, eny, izay mankahala anatra dia ho faty.

¹¹Ny fitoeran’ny maty* sy ny fandringanana aza dia miharihary eo anatrehan’NY TOMPO, koa mainka ny fon’ny zanak’olombelona!

¹²Tsy tian’ny mpaniratsira izay mananatra azy ary tsy mety manatona ny hendry izy.

¹³Mahamiramirana ny tarehy ny fo ravoravo, fa ny alahelon’ny fo dia mahareraka ny fanahy.

¹⁴Ny fon’ny manan-tsaina dia mitady fahendrena, fa ny adala dia mankamamy ny fahadalana.

¹⁵Ratsy avokoa ny andron’ny ory, fa ny faharavoravoana am-po dia sakafom-panasana mandrakariva.

¹⁶Aleo kely misy fahatahorana NY TOMPO toy izay harena be nefa misy tebiteby.

¹⁷Aleo sakafo anana arahim-pitiavana toy izay omby mifahy arahim-pankahalana.

¹⁸Izay malaky tezitra dia manetsika ady, fa izay mahatsindry fo no mampitsahatra fifandirana.

¹⁹Ny lalan’ny malaina dia toy ny fefy tsilo, fa ny lalan’ny marina dia lalambe voalamina tsara.

²⁰Ny zanaka hendry dia mahafaly ny rainy, fa ny lehilahy adala manao tsinontsinona ny reniny.

²¹Ny fahadalana dia fifalian’ny tsy ampy saina, fa ny manan-tsaina kosa mizotra mahitsy.

²²Ho foana ny tetikasa raha tsy misy fiheveran-draharaha, fa raha maro ny mpanolotsaina dia tanteraka izany.

²³Faly ny olona raha mahay mamaly resaka tsara izy, ary endre ny hatsaran’ny teny atao amin’ny fotoana mahamety azy!

²⁴Lalan’aina ho any ambony no alehan’ny hendry hanalavirany ny fitoeran’ny maty any ambany,

²⁵Arodan’NY TOMPO ny tranon’ny mpiavonavona, fa ataony mafy orina ny fanamarihana ny zaratanin’ny mpitondratena.

²⁶Fahavetavetana eo imason’NY TOMPO ny eritreritra hanao ratsy, fa ny teny mamy dia madio.

²⁷Izay fatra-pila harena tsy marina dia mampidi-doza amin’ny ankohonany, fa izay mankahala kolikoly no ho velona.

²⁸Ny fon’ny marina misaintsaina vao mamaly, fa ny vavan’ny ratsy fanahy kosa miboiboika loza.

²⁹Lavitra ny ratsy fanahy NY TOMPO, fa ny vavaka ataon’ny marina no henoiny.

³⁰Ny fijery mamiratra dia mahafaly ny fo ary mamelombelona ny taolana ny filazana soa.

³¹Ny sofina izay mihaino anatra mahavelona dia miara-mitoetra amin’ny hendry.

³²Izay mandà anatra dia manao tsinontsinona ny tenany, fa izay mihaino fananarana no mahazo fahalalana.

³³Ny fahatahorana NY TOMPO dia fitaizana mampahahendry ary ny fanetren-tena dia mialoha ny voninahitra.