Read La Bible en Malgache Ohabolana 16 Bible Online

Ohabolana 16 - La Bible en Malgache bible

Ohabolana 16

¹Ny fikasan’ny fo no an’ny olona, fa ny famalian’ny lela dia avy amin’NY TOMPO.

²Ataon’ny olona ho madio avokoa ny lalana rehetra alehany, fa NY TOMPO no mandanja ny fanahy.

³Ankino amin’NY TOMPO ny asanao dia ho tanteraka izay nokasainao.

⁴Ny zavatra rehetra nataon’NY TOMPO dia samy misy antony avokoa; eny, ny ratsy fanahy koa aza dia nataony ho amin’ny andro hahitan-doza.

⁵Fahavetavetana eo imason’NY TOMPO izay rehetra miavonavona am-po; azo antoka fa tsy ho afa-tsiny izy ireo.

⁶Ny famindrampo sy ny fahamarinana no avotra amin’ny heloka, ary ny fahatahorana NY TOMPO no analavirana ny ratsy.

⁷Raha sitraky NY TOMPO ny alehan’ny olona iray, na dia ny fahavalony aza dia hampihavaniny aminy.

⁸Aleo ny kely omban’ny fahamarinana toy izay ny tombony be azo amin’ny tsy rariny.

⁹Ny fon’ny olona dia mihevitra tsara ny halehany, fa NY TOMPO ihany no mahalavorary ny diany.

¹⁰Ny teny marina dia eo amin’ny molotry ny mpanjaka ary tsy diso teny izy raha mitsara.

¹¹An’NY TOMPO ny fandanjana sy ny mizana marina, andraikiny avokoa ny vatomizana rehetra.

¹²Fahavetavetana eo imason’ny mpanjaka ny fanaovan-dratsy, fa fahamarinana no iorenan’ny sezafiandrianana.

¹³Sitraky ny mpanjaka ny molotra marina ary izay miteny mahitsy no tiany.

¹⁴Ny fahatezeran’ny mpanjaka dia iraky ny fahafatesana, fa ny olon-kendry no mampionona izany.

¹⁵Amin’ny fahamiramiranan’ny tarehin’ny mpanjaka dia misy fiainana, ary ny fankasitrahany dia toy ny rahona amin’ny fararano.

¹⁶Tsara ny mahazo fahendrena noho ny mahazo volamena ary tsara ny mahazo fahalalana noho ny mahazo volafotsy.

¹⁷Ny manalavitra ny ratsy no lalamben’ny marina ary izay mitandrina ny alehany no miaro ny ainy.

¹⁸Ny fiavonavonana dia mialoha ny fahapotehana ary ny fanahy mirehareha dia mialoha ny fahalavoana.

¹⁹Tsara ny mietry miaraka amin’izay manetry tena noho ny mizara babo amin’izay miavonavona.

²⁰Izay mandinika ny teny no hahita soa ary izay matoky NY TOMPO no ho sambatra!

²¹Izay hendry am-po dia lazaina hoe manan-tsaina ary ny teny mamy no mampandroso ny fahalalana.

²²Loharanon’aina ny fahazavan-tsaina amin’izay manana izany, fa ny fananarana ataon’ny adala dia fahadalana ihany.

²³Ny fon’ny hendry dia mahafehy ny fiteniny sady manampy fahendrena eo amin’ny molony.

²⁴Toho-tantely ny teny mahafinaritra ka sady mamin’ny fanahy no fanasitranana ho an’ny taolana.

²⁵Misy lalana ataon’ny olona ho mahitsy, kanjo ny iafarany dia lalana mivarina any amin’ny fahafatesana.

²⁶Ny fahanoanan’ny mpiasa no mampiasa azy; manery azy ny fahazotoany hihinana.

²⁷Mihady lavaka hampidi-doza ny ratsy fanahy sady misy toy ny afo mandoro eo amin’ny molony.

²⁸Mamafy fifandirana ny mpivadika ary mampisaraka ny tena mpisakaiza ny mpifosa.

²⁹Ny olon-doza dia mitaona ny namany ka mitarika azy amin’ny lalana tsy tsara.

³⁰Izay manakimpy ny masony hieritreritra zava-dratsy sady manaikitraiki-molotra dia efa manatanteraka ny ratsy.

³¹Satroboninahitra tsara tarehy ny volo fotsy; eo amin’ny lalan’ny fahamarinana no ahazoana azy.

³²Tsara ny olona mahatsindry fo noho ny mpiady mahery ary izay mahafehy ny fahatezerany noho izay mahafa-bohitra.

³³Ny antsapaka dia atsipy ao ampofoany, fa ny fitsarana rehetra dia avy amin’NY TOMPO.