Read La Bible en Malgache Ohabolana 17 Bible Online

Ohabolana 17 - La Bible en Malgache bible

Ohabolana 17

¹Tsara ny sombi-mofo maina misy fiadanana noho ny trano feno hena misy fifandirana.

²Ny mpanompo hendry dia mifehy ny zanaka manao izay mahamenatra; hiray lova amin’ny mpirahalahy izy.

³Ny memy dia ho famantarana ny tena volafotsy ary ny fatana fandrendrehana ho famantarana ny tena volamena, fa NY TOMPO kosa no Mpamantatra ny fo.

⁴Ny mpanao ratsy dia manongilan-tsofina amin’ny molotra mandainga ary ny mpandainga mihaino ny lela mampidi-doza.

⁵Manala baraka ny Mpanao azy izay mihomehy ny mahantra ary izay faly amin’ny loza mitranga dia tsy ho afa-tsiny.

⁶Satroboninahitry ny antitra ny zafiny ary voninahitry ny zanaka ny rainy.

⁷Tsy mendrika ny adala ny manao teny jadona ary vao mainka tsy tokony ho an’ny olo-manankaja ny molotra mandainga.

⁸Ny kolikoly dia heverin’izay manao azy ho toy ny vatosoa ka na aiza na aiza no alehany dia ambinina ihany izy.

⁹Izay mikatsaka ny fihavanana dia manarona heloka, fa izay mamohafoha heloka mampisaraka ny tena mpisakaiza.

¹⁰Ny anatra iray dia mandaitra kokoa amin’ny hendry noho ny kapoka injato amin’ny adala.

¹¹Ny maditra dia fatra-pitady ny fikomiana ka iraka lozabe no irahina hamely azy.

¹²Aleo mifanena amin’ny bera very anaka, toy izay amin’ny adala ao anatin’ny hadalany.

¹³Izay mamaly ratsy ny soa dia tsy hialan’ny ratsy ao an-tranony.

¹⁴Ny manomboka ady dia toy ny manata-drano; koa ilaozy ny fifandirana dieny tsy mbola mifandramatra.

¹⁵Izay manamarina ny meloka na izay manameloka ny marina dia samy fahavetavetana eo imason’NY TOMPO.

¹⁶Hatao inona re ity vola an-tanan’ny adala? Hamidy fahendrena va? Tsy manan-tsaina akory izy!

¹⁷Izay tena sakaiza tokoa dia tia amin’ny andro rehetra ary ny rahalahy dia nateraka hamonjy amin’ny fahoriana.

¹⁸Olona tsy ampy saina izay mifandray tanana hiantoka ny sakaizany.

¹⁹Izay tia ady dia tia heloka ary izay manao vavahady avo, mitady faharavana.

²⁰Izay fo maditra dia tsy hahita soa ary izay manana lela mandainga hivarina any amin’ny loza.

²¹Izay miteraka adala dia hahazo alahelo ary ny rain’ny adala tsy mba manam-pifaliana.

²²Ny fo ravoravo dia mahasalama tsara, fa ny fanahy kivy mahamaina ny taolana.

²³Ny ratsy fanahy dia mandray kolikoly avy any anaty lamba hoentiny mamadika ny rariny.

²⁴Eo anoloan’ny manan-tsaina ny fahendrena, fa ny mason’ny adala dia mibirioka any amin’ny faran’ny tany.

²⁵Ny zanaka adala dia mampalahelo ny rainy sady fahoriana mangidy amin’ny reniny niteraka azy.

²⁶Tsy mety ny mampandoa sazy ny marina, na mamely ny manankaja tsy amin’ny rariny.

²⁷Izay mahafihim-bava no manam-pahalalana, ary izay mahatsindry fo no manan-tsaina.

²⁸Na ny adala aza raha tsy miteny dia toa hendry, ary izay mahafihina ny molony dia manan-tsaina.